Sîyasetmedarên kurd, li dijî êrîşên PDK’ê yên li ser gerîlla bang li PDK’ê kirin ku ”Nebe sedema şerê navxweyî.” Sîyasetmedaran da zanîn ku divê hêz û partîyên Kurd, şerê birakûjî weke xeta sor bihesibînin û li dijî wê derkevin.
Li ser êrişa PDK’ê ya li dijî gerîlayan bertek û nerazîbûn zêde dibin.
Sekreterê Partîya Demokratî Kurdistanî-Sûrîyê (PDK-S) Ebdulkerîm Siko li ser mijarê axivî û got,
Eger di navbera PDK’ê û dewleta Tirk de peyman hebin ew peyman ne rewa ne û nekevin xizmetî gelê Kurd.
Ebdulkerîm Siko banga parastin û xwedîderketina destkeftiyên heyî kir û got,
“Me astên dijwar derbas kirin û li hember gelek astengiyan sekinîn û gelê Kurd gelek qurbanî ji bo parastina herêmê da.
Pêwîste ji bo parastina van destkeftiyan û têkbirina armancên dewleta Tirk, yekîtiya neteweyî were avakirin.”
Sekreterê Partiya Roj a Demokratîk a Kurd li Sûriyê, Kovan Kenho jî destnîşan kir ku bi dijminên gelê Kurd re dostanî nabe.
Kovan Kenho bang li PDK’ê kir ku nebe sedema şerekî navxweyî û got, “Divê hêz û partiyên Kurd şerê birakujiyê wekî xeta sor bihesibînin.”
Loqman Hesen: PDK ji bo bi cih anîna fermanên erdogan tevdigere
Çavdêrê siyasî Loqman Hesen li ser siyaseta şerxwaz a PDK’ê ji Rojnews re axivî û got,
“Tirkiye bi xwe nikare li hemberî gerîla bigihe armanca xwe, ji bo vê jî hewl dide hêzên Kurd bixe nav şer.
Siyaseta PDK’ê a li hemberî PKK’ê, tenê ji bo bicihanîna ferman Erdoxan û Tirkiyê ye.
Siyaseta wan xewna dagirkerên Kurdistanê ye.
Ev pilanek stratejîk û ya Erdoxane, wê ziyanê bigihîne hemû welatên cîhan û bi taybet jî cîran.”