Varianta Omicron li DYA mîna kaposê lê hatiye. Di 24 saetan de, bêtirî milyonek kes li welat pêketin. Ev jî rekora nû ya pêketiyane. Her wiha 2 hezar û 600 seferên balafiran jî hatin betalkirin.
Li gelek bajarên Almanyayê ji bo şermezarkirina tevdîrên Coronayê dîsa xwepêşandan hatin lidarxistin. Di xwepêşandanên ku zêdeyî 35 hezar kes beşdar bûn de, dem bi dem bi polîsan re pevçûn derket.
Di demeke ku Covid-19 bi lez belavbûna xwe li seranserê cîhanê dewam dike, rekorek nû hate tomar kirin.
Li gor daneyên 24 saetên dawî yên Covid-19 ku ji aliyê Zanîngeha John Hopkinsê ve hatin eşkerekirin, doh li Dewletên Yekbûyî yên Amerîka (DYA) milyonek û 83 hezar û 948 kes bi vîrûsê ketine.
Bi vê yekê rekoreke nû hat bidestxistin.
Li welêt di 24 saetên dawîn de, ji ber Covid-19, 693 kes mirin.
Li gorî daxuyaniyên berê yên Wezareta Tenduristî û Xizmetên Mirovî, hat diyarkirin ku piştî nêzî 4 mehan cara yekeme zêdeyî 103 hezar kes li nexweşxaneyê hatin dermankirin.
Tê zanîn ku li DYA ji sedî 62’ê nifûsa welat li dijî Covid-19 hatine derzî kirin.
Geşta 2600 balefiran hat betalkirin
Li DYA yê di roja yekem a xebatê ya sala nû de ji ber zêdebûna bûyerên Covid-19 û mercên nebaş ên hewayê zêdeyî 2 hezar û 600 seferên balefiran hatin betalkirin.
Her wiha 3100 seferên balefiran jî hatin paşxistin.
Li seranserê cîhanê doh, 4100 seferên balefiran pêk nehatin.
Hat diyarkirin ku ji destpêka betlaneya Noelê ya 24’ê Kanûnê ve, li DYA bi tevahî 18 hezar seferên balefiran nehatine kirin.
Li Almanya bi dehezaran qedexeyên ji ber Corona şermezar kirin
Di xwepêşandanên ku doh danê êvarê li gelek bajarên Almanyayê hatin lidarxistin de, tedbîrên hikûmetê yên li dijî vîrûsa corona hatine girtin, hatin şermezar kirin.
Bêtirî 35 hezar kes beşdarî xwepêşandaênan bûn.
Li gorî agahiyên polîsan parvek kirî, piştî xwepêşandêran qanûnên parastina navber û maske pêk ne anîn wan destwerdan kirine.
Li Magdeburg, Rostock û Lichtenstein di navbera polîs û xwepêşanderan de pevçûn derket.
Xwepêşandana li bajarê eyaleta Rostockê jî bû cihê pevçûnan.
Polîsan bi çopan destwerdana çalakiya ku nêzî 4 hezar kes lê amade bûn, kir.
Polîsan ragihand ku di nav beşdaran de komên rastgir û hezkiriyên futbolê yên ji tundiyê re amade hene.
