Sûcê şer li Kolombiya piştî bêtirî 10 salan nû zelal dibe.
Li Kolombiyayê 10 leşkerên teqawîtbûyî li xwe mikur hatin ku di navbera salên 2007 û 2008’an de 120 ciwan bi rengekî bêrehm qetil kirine.
Ji bo vî sûcê xwe jî veşêrin, ev sivîl weke gerîlayên FARC ê nîşan dane.
Li Kolombiyayê 10 leşkerên teqawît li pêşberî malbatên qurbaniyan li xwe mikur hatin ku di navbera salên 2007 û 2008’an de di kuştina zêdeyî 100 sivîlê de berpirsyariya wan heye.
Mikurhatin di rûniştina dîrokî ya Hiqûqa Aştiyê ya Taybet (JEP) ya li eyaleta Norte de Santander a ku komkujî lê hate kirin, pêk hat.
JEP sûcên şer ên nîv sedsalê mehkeme dike ku zêdeyî 9 milyon kes hatin kuştin, revandin, windakirin, seqet hatin hiştin û ji cih û warê wan hate kirin.
Leşkeran 120 ciwan qetil kirin û weke gerîla nîşan dan
Leşkerên teqawît ku hemû jî general, çar serheng, pênc leşker û sivîlek bûn, mikur hatin ku li bajarê Ocanayê yê ku nifûsa xwe 100 hezar kes e 120 ciwan revandin:
Piştre, bi rengekî bêrehm qetil kirin û ew weke gerîla nîşan dan.
Rûniştina ji 2 rojan li Zanîngeha Ocanayê pêk hat.
Derdora 50 malbat tevlî rûniştinê bûn.
Dadger Catalîna Dîaz bang li leşkerên berê kir ku bi rengekî eşkere bersivê bidin pirsan û beriya her tiştî berpirsyariyên xwe li pêşberî malbatên mexdûr û welêt qebûl bikin.
Dadger: Bêcezahiştina bi dehan salan bi dawî dibe
JEP ku ji pênc dadgeran pêk tê daxuyaniyek da û got,
“Piştî bêdengî û tirsa bi salan, kêliya heqîqetê dawiya dawî bêcezahiştina bi dehan salan bi dawî kir.”
Yek ji leşkeran Nestor Gûtîerrez got,
“Weke yek ji hevparê vî sûcê şer, berpirsyariya xwe nas dikim û qebûl dikim.
Me mirovên bêguneh kuşt (…)
Yên ku me ew kuşt gundiyên ji rêzê bûn.”
Li gorî JEP’ê di navbera salên 2002 û 2008’an de li welêt ji bo berjewendiyên madî yên artêşê nêzî 6.400 sivîl hatin înfazkirin.
Heta niha nêzî 20 kesî berpirsyariya xwe ya têkildarî van sûcan qebûl kiriye.
JEP sala 2016’an di çarçoveya peymanê de hate avakirin
Dadgeha Taybet di çarçoveya peymana aştiyê ya dîrokî ya sala 2016’an de ava bû ku peyman di navbera Hêzên Çekdar ên Şoreşger ên Kolombiyayê (FARC) û dewletê de hate îmzekirin.
Li gorî peymanê, kesên ku li sûcên xwe mikur bên û tazmînatê bidin mexdûran wê karibin sûdê ji cezayên alternatîf ên girtîgehê werbigirin.
Meha Çileyê jî heyşt lîderên berê yên FARC’ê berpirsyariya xwe qebûl kiribûn û bi revandina 21.396 kesî hatibûn sûcdarkirin.
Tê payin ku biryara destpêkê ya dadgehê di nava sala 2022’an de bê dayin.
