Kampa herî xeter di cîhanê de, Kampa Holê..
Ji vê kampê rojane nûçeyên kuştin û revandinê tên bihîstin.
Di vê kampê de, li gorî daneyên belgekirî, heta niha 148 kes hatine kuştin û 103 jî hatine birîndarkirin.
Ji ber hebûn û fikra tundrew a malbatên çeteyên DAIŞ’ê, ev sûc tevî hemû hewildan û xebata hêzên ewlekariyê jî, her dewam in.
Kampa herî xeter li ser rûyê erdê, Kampa Holê.
Tevî hebûna penaber û koçberên Sûrî di kampê de, jimareke mezin ji malbatên çeteyên DAIŞ’ê jî lê dimînin.
Jimara jin û zarokên çeteyên DAIŞ`ê yên biyanî digihêje 8 hezar û 109 kesî.
Ev kes jî 54 welatan in û di beşekî cûda bi navê “Beşa El-Muhacîrat” de dimînin.
Hebûn û fikra van malbatên çeteyên DAIŞ’ê rojane dibe sedema kuştin an birîndarkirina mirovekî.
Ji bilî vê, sûcên mîna revandin û şewitandina konan jî her hene.
Ji sedemên sereke yên pêkhatina van sûcan jî, redkirina fikrê tundrew ê DAIŞ’ê ye.
Li gorî daneyên belgekirî ku ajansa Hawarê bi parve kirine, heta niha li Kampê 148 kes hatine kuştin.
Ji bilî kuştiyan, 103 kes jî birîndar bûne.
Û tenê di nava 5 mehên borî de 18 kes hatine kuştin, 13 birîndar bûne û 23 kon jî bi zanebûn hatine şewitandin.
Hemû sûc jî bi destê şaneyên çeteyên DAIŞ’ê yên di kampê de pêk tên.
Taybet bi hatina malbatên çeteyan ji kampê re, êdî bûyerên bi vî rengî li kampê destpê kirin.
Di vî alî de hewildan û xebatên Hêzên Ewlekariya Hundirîn ên sînordarkirina van sûcan her hene û heta astekê bi encam dibin.
Lê ji ber ku şaneyên DAIŞ’ê di ferzkirina fikrê xwe yê tundrew de dewam in, ev sûc jî li kampê bi dawî nabin.
Kesê ku fikrê wan red dike û tevli nebe, yekser dibe armanca wan û tê kuştin.
Ji ber vê rewşê û xeteriya kampê bi dehê caran Rêveberiya Xweser banga dîtina çareserî û pêkanîna erk û berpirsyariyê li welatên cîhanê kiriye.
Lê belê heta niha ev bang bi cih nehatine û ev rewşa kampê jî weke xwe maye.
