Hevserokê Meclisa Rêveber a Herêma Firatê Enwer Muslim têkildarî komkujiya 25’ê Hezîranê ya li Kobanê axivî. Enwer Muslim diyar kir ku hişmendiya kesên ku komkujiya Kobanê pêk anîn, hîna li ser cîhanî xeter e û got: Divê çeteyên DAIŞ’ê li welatê ku sûc kirine, werin darizandin.
Hevserokê Meclisa Rêveber a Herêma Firatê Enwer Muslim têkildarî komkujiya Kobanê ya 25’ê Hezîranê axivî.
Enwer Muslim diyar kir ku dewleta Tirk jî rolek di komkujiyê de lîstiye û wiha got:
Tirkiyê bi rêya komên tundrew gelek komkujî li ser gelê Kurd pêk anîn e.
Gelek belge û dîmen hene ku asta piştgiriya hikumeta Tirkiyê ji DAIŞ`ê diyar dikin.
Me gelek caran ji civaka navdewletî xwestiye ku li dijî binpêkirinên Tirkiyê helwest nîşan bide.
Tirkiyê ji ber wêrankirina herêmê, kuştina bi hezaran kes û desteka terorê, divê were darizandin.
Musilm destnîşan kir ku DAIŞ`ê ne tenê li ser gelê Kurd, li ser gelê Sûriyê û heta gelê Tirk jî xeteriyek e.
Muslim îşaret pê kir ku çeteyên DAIŞ’ê di aliyê leşkerî de têkçûne, lê hişmendiya wan bidawî nebûye û ev tişt anî ziman:
Diyar e ku DAIŞ wisa bi hesanî bi dawî nabe.
Hişmendiya ku bi salan komkujî pêk anîn, hîna çalak in û li ser tevahî cîhanê xeter in.
Bi hezaran kes ku hişmendiya DAIŞ a terorîst girtine li Ewropa û Sûriyê, bi taybet li Idlib, Ezaz û Efrînê belav bûne.
Divê çeteyên DAIŞ’ê li welatê ku binpêkirin pêk anîne, werin darizandin. Li gorî qanûnên navdewletî divê li vir werin darizandin.
Hevserokê Meclisa Rêveber a Herêma Firatê Enwer Muslim destnîşan kir ku ev komkujî peyameke ji bo Kurdan bû ku divê bibin yek û biryareke hevpar û xurt bistînin.