Êrişên dewleta Tirk ya dagirker û çeteyên wê yên li ser bakur û rojhilatê Sûriyê bê navber dewam dikin. Dagirkeran îro careke din êrişî herêmê kirin.
Balafireke bê mirov û bi çek dewleta Tirk, li Girkê Legê erebeyeke bombebaran kir. Di encamê de 2 welatî şehîd bûn.
Êrîş li ser xaçerêya gundê Til Ceman ê ku 5 km dûrî navçeya Girkê Legê ye pêk hat.
Li gorî agahiyan di êrîşê de 2 welatî şehîd bûn.
Lê heta niha Asayîşê derbarê êrişê de daxuyanî nedaye.
Artêşa Tirk gundên Zirganê topbaran kirin
Li aliyê din, Artêşa Tirk a dagirker îro gundên Esediyê û Mişêrfê yên li rojavayê navçeya Zirganê bi çekên giran, topbaran kir.
Derbarê encaman de agahî nehatin zanîn.
Leşker û çeteyên dewleta Tirk duh derengiya şevê jî gundê Bûbê yê bakurê rojavayê Zirganê bi obîsan topbaran kir.
Di topbaranê de nuqteyeke hêzên hikumeta Şamê bû hedef û di encamê de leşkerekî hikumeta Şamê birîndar bû.
Dagirkeriya Tirk û çeteyên wê gundê Bênê yê navçeya Şêrawa ya Efrîna dagirkirî jî topbaran kir.
Her wiha di saetên nîvro de jî dagirkeran gundê Dirdara yê girêdayî navçeya Til Temirê topbaran kir.