HPG ragihand li herêma Xakurkê di encama çalakiyên gerîllayan de, 2 leşkerên Tirk ên dagirker hatin kuştin. HPG’ê diyar kir ku artêşa Tirk sûcên dij mirovahiyê jî berdewam dike û got, 27’ê Cotmehê, 2 caran bi çekên kîmyewî û 10 caran bi bombeyên qedexekirî, qadên gerîlla hatin bombebarankirin.
Navenda Ragihandin û Çapemeniyê ya HPG’ê têkildarî rewşa dawî ya li qadên şer, raya giştî agahdar kir.
Li gorî daxuyaniya rojane;
Li herêma Xakûrkê 27’ê Cotmehê, gerîlayan li qada Girê Şehîd Şahan li hêzên dagirker xistin.
Di vê çalakiyê de çeperek hat rûxandin û 2 leşker hatin kuştin.
Heman rojê, li qada Girê Şehîd Axîn jî gerîllayên jin bi çekên giran derb li hêzên dagirker dan.
“Artêşa Tirk a dagirker 12 caran bi çekên kîmyawî êriş pêk anîn”
Navenda Ragihandinê ya HPG’ê têkildarî êrişên artêşa Tirk a dagirker jî ev agahî parve kirin:
Roja 27’ê Cotmehê,
2 caran bi çekên kîmyewî,
10 caran bi bombeyên qedexekirî,
3 caran bi balafirên şer û 14 caran jî bi helîkopteran, qadên gerîla hatin bombebarankirin.
“Artêşa Tirk li Metîna cenazeyên leşkerên xwe şewitand”
Li aliyê din Berdevkê Ragihandinê û Çapemeniyê ya HPG’ê Serdar Yektaş jî beşdarî bernameyeke Stêrk TV bû êrişên dewleta Tirk a dagirker û berxwedana gerîla nirxand.
Yektaş diyar kir 11’ê Îlonê gerîlayan li Girê Cûdî ya Metînayê li dijî leşkerên Tirk ên dagirker çalakî pêkanîne û da zanîn di encamê de çend leşkerên Tirk hatine kuştin.
Yektaş anî ziman artêşa Tirk ji ber qada şer tengavbûye nikare cenazeyên xwe jî rake û ragihand li dijî cenazeyên xwe hovîtî pêkaniye.
Serdar Yektaş eşkere kir ku artêşa Tirk li qada Girê Cûdî ya şer cenazeyên leşkeran şewitandiye û got:
“Belgeyên şewitandina cenazeyên leşkeran di destê me de ne.”
Yektaş li ser bikaranîna çekên kîmyewî û qedexekirî jî bersiva rayedarên Tirk da û got:
“Belgeyên ku me derbarê bikaranîna çekên kîmyewî de wşandine tenê beşekin, belgeyên ku me parve nekirine jî hene.”
