Navenda ragihandinê ya Hêzên Sûriyeya Demokratîk QSD, têkildarî merasîma şervanên YAT’ê yên di qezaya helîkopteran de şehîd bûn, daxuyaniyek da.
QSD di daxuyaniya xwe de teqez kir ku ew ê merasîmekî bi heybet ji her 9 şehîdan re li dar bixin û got:
”Roja Çarşemê 22’ê Adarê, hêzên me dê merasîmên fermî yên leşkerî û gelêrî, ji bo oxirkirina 9 şehîdên hêzên YAT’ê, ku 15’ê Adarê li Başûrê Kurdistanê di qezayê de şehîd bûn, li dar bixe.
Merasîm dê saat 11’an li bajarê Hesekê pêk werin û dê ji hemû deverên Bakur û Rojhilatê Sûriyê, her wiha hevparên hêzên me yên şerê li dijî terorê, beşdar bibin.’
QSD daxuyaniya xwe wiha bi dawî kir:
”Şervanên me di ber herêmê de û ji bo parastina pêkhateyên wê xwîna xwe rijand, em gelê xwe yê wefadar û welat-hez vedixwînin merasîmên oxirkirina şehîdên xwe.”
