Rêveberiya Karûbarên Niştecihbûnê yê Iraqê ragihand ku ji destpêka salê ve 4 hezar û 658 binpêkerên biyanî hatine girtin.
Di daxuyaniya rêveberiyê de hat diyarkirin ku yên herî zêde ji bo kar an jî serdanê tên Iraqê Bangledeşî û Pakîstanî ne.
Her wiha Neteweyên Yekbûyî, ragihand ku di dema êrişa çeteyên DAIŞ’ê de li Iraqê 6 milyon kesan ji neçarî ji ser mal û erdên xwe koçber bibûn.
Lê niha nêzî 5 milyon koçberên Iraqê vegeriyane ser mal û erdên xwe.
Rêveberiya Karûbarên Niştecihbûnê yê Iraqê Hisên Yesarî hejmara welatiyên biyanî yên ku ji serê salê ve li Iraqê hatine girtin de ji medya Iraqê re ragihand.
Di daxuyaniyê de hate ragihand ku binpêkerên biyanî yên li nav Iraqê ne tenê karkerên biyanî ne, her wiha hinek ji wan ji bo geştyariyê yan jî serdana navendên olî û dîrokî hatine Iraqê.
Heman daxuyaniyê de hate diyarkirin ku ji bo welatiyên biyanî yên ku ji bo geştyarî yan jî serdanê hatine welat dema mayînê mehek tê dayîn.
Hisên Yesarî da zanîn ku ji hemû netewan li Iraqê hene ku bi şêweyek sereke herî zêde Bangledaşî û Pakistanî ji bo kar yan jî serdanê têne Iraqê û wiha got:
“Ji destpêka salê ve 4 hezar û 658 binpêkerên biyanî hatine girtin.
Li hemberî wan rêkarên yasayî hatine pêkanîn û beşek ji wan jî ji bo welatên wan dê werin şandin.
Amadekarî tê kirin ku hezar û 600 kes ji bo welatên wan werin şandin.”
Herî dawî Rêveberiya Karûbarên Niştecihbûnê yê Iraqê Hisên Yesarî ragihand ku sala 2023’yan 8 hezar û 45 binpêkerên biyanî hatin girtin ku tê payîn îsal ev hejmar zêde bibe.
NY: Nêzî 5 milyon koçberên Iraqê vegeriyane welêt
Her wiha malpera Rlive Web a girêdayî ofîsa Neteweyên Yekbûyî, di derbarê vegera koçberên Iraqê ya li ser malên xwe de raporek belav kir.
Di raporê de tê gotin ku di dema şerê DAIŞ’ê ya sala 2014’an de li Iraqê 6 milyon kes ji neçarî ji ser mal û erdên xwe koçber bûn.
Di dewama raporê de îşaret bi vegera koçberan a li ser malên xwe jî hatiye kirin û tê gotin ku niha nêzî 5 milyon koçberên Iraqê vegeriyane ser mal û erdên xwe.
Her wiha hatiye diyarkirin ku niha zêdetirî milyonek û 100 hezar Iraqî li nava parêzgehên Iraqê de wek koçber mane û rojane bi astengiyên mezin re rû birû dimînin.
