Sekreterê Giştî yê NATO’yê Jens Stoltenberg li Brukselê di daxuyaniya çapemeniyê de anî ziman ku ew hêvî dikin ku şer bi dawî bibe.
Alîkara Serokwezîra Belçîkayê Petra De Sutter bertek nîşanî şerê bejahî yê li ser Lubnanê da û got: “Dagirkirina bejahî ya plankirî ya li ser Lubnanê bi awayekî tund hiqûqa navneteweyî binpê dike.
Sekreterê Giştî yê NATO’yê Jens Stoltenberg ku di demekê nêz erka xwe radestî Mark Rutte (MARK RÛT) bike, beriya merasima ku li navenda NATO’yê ya li Brukselê hat lidarxistin daxuyani da çapemeniyê.
Jens Stoltenberg li ser pirsa rewşa Lubnanê wiha got:
“Helbet em tiştên ku li Lubnanê diqewimin ji nêz ve dişopînin, lê NATO li wir xwedî roleke taybet nîne.”
Stoltenberg diyar kir ku ew wek tifaq bi hemû hevkarên xwe yên li wir di nava têkîliyê de ne û got:
“Bê guman, em hêvî dikin ku di zûtirîn dem de şer bi dawî bibe.
Em ji ber zêdebûna aloziya ku li Rojhilata Navîn û Lubnanê dibînin, bi fikar in.”
Belçîka: Dagirkirina bejahî ya Lubnanê qanûnên navneteweyî binpê dike
Li aliyê din Belçîkayê bertek nîşanî şerê bejahî yê li ser Lubnanê da.
Alîkara Serokwezîra Belçîkayê Petra De Sutter got:
“Dagirkirina bejahî ya plankirî ya li ser Lubnanê bi awayekî tund hiqûqa navneteweyî binpê dike.
Ev ne xweparastin e, provokasyona şerê topyekun e.”
Petra De Sutter di parvekirina xwe ya li ser hesabê xwe yê medyaya civakî de jî bal kişand ser şerê li Lubnanê û ev yek anî ziman:
“Divê tavilê agirbest li Lubnanê bê pêkanîn.
Yekîtiya Ewropayê û civaka navneteweyî divê bi sepandina cezayên herî zêde bersivê bidin Îsraîlê.”
Melencon: Mafê Lubnanê heye ku xwe biparêze
Her wiha siyasetmedarê partiya çep a tundrew Jean-Luc Melenchon (Jan-Luk-Melenkon) jî di nivîsa xwe ya li ser hesabê X’ê de peyama hevgirtinê bi gelê Lubnanê re parve kir.
Melenchon got:
“Felaket…Dagirkeriya Lubnanê dest pê kir. Mafê Lubnanê ye ku li hemberî Netanyahu xwe biparêze.
Welatên ku hiqûqa navneteweyî piştgirî dikin, ji bo vê yekê jî wekî ku bi Ukrayniyan kirin, divê amûrên pêwîst ji Lubnanê re bidin.”
