Parlamentera DEM Partiyê ya Mêrdînê Bêrîtan Guneş Altin li ser rola jinan di banga Rêber Apo de axivî.
Bêrîtan Guneş Altin got “Herî baş jin dizanin bê ka şer tê çi ye.
Lewma jî yên ku pêvajoyê bi ser bixin dîsa dê jin bin.”
Rêxistinên jinan bi çalakiyên xwe pêşengtiyê ji pêvajoya aştiyê ya ku li ser banga 27’ê Sibatê ya rêber Abdullah Ocalan dest pê kiriye re dikin.
Bi armanca xwedîderketina li banga aştiyê 31’ê Gulanê de li bajarê Amedê yê bakurê Kurdistanê bi deh hezaran jin meşek bi rêxistin kirin.
Parlementera DEM Partiyê ya Mêrdînê Bêrîtan Guneş Altin rola jinan a pêkanîna banga rêber APO anî ziman.
Bêrîtan Guneş Altin diyar kir ku banga “Aştî û Civaka Demokratîk” berpirsyariyên mezin danîne ser milê jinan û got:
“Di vê banga rêber Ocalan de peyamên girîng ji bo jinan hebûn.
Li ser vê bingehê em têkoşîna xwe dimeşînin.
Di meşa mezin a li Amedê de jinan peyameke zelal da.
Silavên xwe ji Girava Îmraliyê re jî şandin û nîşan dan ku ew ê aştiyê hembêz bikin.
Şer herî zêde zirarê dide bedena jinan.
Ji ber vê yekê jin dê bibin pêşengên aştiyê.
Jin dê di pêvajoya pêş de jî pêşengiyê bikin”.
Bêrîtan Altin: Yên ku wê pêvajoyê bi ser bixin jin in
Di heman çarçoveyê de Bêrîtan Guneş Altin bal kişande ser girîngiya konferansên ku parlameterên jin û Koalîsyona Jinan a Demokratîk a Herêmî ya Rojhilata Navîn û Bakurê Afrîkayê (NADA) organîze kirine jî û wiha got:
“Herî baş jin dizanin bê ka şer tê çi wateyê.
Lewma jî yên ku vê pêvajoyê bi ser bixin dîsa dê jin bin.”
Bêrîtan Guneş Altin da zanîn ku Konferansa Parlamenterên Jin ji bo xurtkirina yekîtiya jinan hat lidarxistin û wiha dewam kir:
Bêrîtan Altin: Jinan nîşanî her kesî da ku ew ê aştiyê biparêzin
“Konferansa parlamenterên jin ya beriya çend rojan ku li Amedê hat lidarxistin, gelekî girîng bû.
Ev ne cara yekemîn e ku parlamenterên jin ên Kurd tên cem hev.
Berê jî çalakiyên bi vî rengî hebûn.
Ji Bakur, Başûr Rojava beşdarî çêbûn.
Mixabin ji Rojhilat tevlîbûn çênebû lê peyama wan jî hate xwendin.
“Pêvajoya aştiyê wê bibe tekoşîna ji bo bidestxistina nasnameya jinan”
Bêrîtan Guneş Altin di nava axaftina xwe de bal kişand ser axaftinên Rêber Apo yên hevdîtinan li gel şandeya Îmraliyê derbarê jinan û got:
“Pirsgirêka jinan ji pirsgirêka Kurd mezintir e.
Ev pêvajo dê bibe pêvajoya tekoşînê ji bo bidestxistina nasnameya jinan jî.
Îro careke din jinan nîşanî her kesî da ku ew ê aştiyê biparêzin.”
