Komîteya Ekolojiyê ya KCK’ê diyar kir dewlet û hikumeta AKP’ê berpirsyarên şewatên li daristanan e û got,
”Divê em nirxên xwe yên hevbeş, av, ax û daristanên xwe biparêzin.”
Komîsyona Jîngehparêziyê a KNK’ê jî bang li gel û jingehparêzan kir ku bibin yek û welat û daristanên xwe biparêzin
Li Tirkiye û Kurdistanê bi rojane daristan dişewitin û ji aliyekî ve jî qirkirina xwezayê tê kirin.
Komîteya Ekolojiyê ya KCK’ê derbarê mijarê de daxuyaniyeke nivîskî da û jîngehparêzên jiyana xwe ji dest dane bibîranîn.
Komîteyê bal kişande li ser şewatên ku li bajarê Tirkiyê û Rojhilatê Kurdistanê ku bi rojane dewam dikin û ji ber kesên ku jiyana xwe ji dest dane xemgîniya xwe anî ziman û wiha got,
KCK: Em ê xwezayê biparêzin û têkoşîna Ekolojiyê mezin bikin
“Li Tirkiye û Kurdistanê her roj şewateke nû ya daristanan û komkujiyeke nû ya xwezayê rû dide û di encamê de em berdelên giran didin.
Ev ewladên gel ku di şewatê de jiyana xwe ji dest dane mînake herî mezin ya welatparêzî û têkoşîna ekolojiyê nîşan dan.
Emê di her şert û mercî de xwezaya ku di berdela wê de canê xwe bexş kirine biparêzin û têkoşîna ekolojiyê mezin bikin.”
KCK: Berpirsyarên şewatên daristanan dewlet û hikûmeta AKP’ê ye
Komîteyê diyar kir weke ku rayedar îdia dikin sedema şewatên daristanan ne germahî an jî nehişyarbûne û got,
“Di van şewatan de bi awyekî eşkere berpirsyariya dewletê û berpirsyariya ereke a hukumeta AKP heye.
Hikûmeta AKP’ê ne tenê bi xemsariya li hemberî şewatên daristanan, bi polîtîkayên li dijî gel û xwezayê jî bi salane êrîşên mezin pêk tîne û polîtîkayên qirkirinê derxistiye asta herî jor.”
KCK: Divê em av, ax û daristanên xwe biparêzin
Komîteya Ekoloiyê ya KCK’ê di dawiyê de bal kişande li ser girîngiya têkoşîna hevbeş a li Tirkiye û Kurdistanê û got,
“Divê em nirxên xwe yên hevbeş, ava xwe, axa xwe û daristanên xwe biparêzin.
Têkoşîna hevbeş, li hemberî hemû xetereyan mîsogeriya herî mezin e.”
KNK: Divê gel û jîngehparêz welat û jîngeha xwe biparêzin
Komîsyona Jîngehê ya KNK’ê jî têkildarî şewata li çiyayê Aviyerê yê bajarê Sine yê Rojhilatê Kurdistanê daxuyaniyek da, şehîdên jîngehparêz bibîr anî û ji malbatên wan re sersaxî xwest.
KNK’ê polîtîkayên qirkirina xweza û civakî ya rejîma Îranê şermezar kir û wiha got,
“Rejîma Komara Îslamî ya Îranê bi awayekî sîstematîk jîngeha Rojhilatê Kurdistanê talan kiriye, bi zanebûnî ji bo wêrankirina wê dixebite.
Girtina çalakvanên jîngehê û şewitandina daristanan hewldaneke qestî ji bo wêrankirina xwezaya Rojhilatê Kurdistanê ne.
Şewitandina xweza û daristanan, wêrankirina deverên parastî, destdirêjiya li ser çavkaniyên avê, ne tenê li dijî jîngeh û gelê Kurd e, li dijî jiyan, dîrok û mirovahiyê ye jî.”
KNK’ê diyar kir ew têkoşîna ji bo jîngehparêzîyê weke mijareke bingehîn dibînin û bang li gel û jingehparêzan kir ku bibin yek welat, jîngeh û daristanên xwe biparêzin.
