Nîqaşên li ser nasîna dewleta Filîstinê û çareseriya du dewletan dewam dike.
Serokwezîrê Brîtanyayê Keir Starmer hin şert ji bo Îsraîlê danîne û gotiye ku eger ev şert neyên bicîhanîn, ew ê di meha Îlonê de di Civata Giştî ya Neteweyên Yekbûyî de Filistînê wekî dewletek nas bikin.
Serokwezîr Starmer şertên xwe yên sereke di civîneke çapemeniyê de wiha rêz kirin:
“Daxuyaniyek pabendbûna bi pêvajoyek aştiyê ya demdirêj ku dê çareseriyek du dewletan bi dest bixe,
Divê gavên girîng werin avêtin da ku rewşa xirab a li Xezayê bi dawî bibe,
Daxuyaniyek zelal ku Şerîaya Rojava wê neyê îlhaqkirin.”
Starmer teqez kir ku armanca wan dewletek Filistînî ya domdar û serwer bi Îsraîlek ewledar re ye.
Serokwezîr diyar kir ku ev daxuyanî ji ber “rewşa bêtehamul a li Xezayê” û “windabûna hêviya ji bo çareseriyek du dewletan” hatiye dayîn.
Malta biryar da ku dewleta Filistînê di Îlonê de nas bike
Her wiha serokwezîrê Maltayê, Robert Abela, duh ragihand ku welatê wî dê Dewleta Filistînê di Civata Giştî ya Neteweyên Yekbûyî ya di Îlonê de nas bike.
Robert Abela ev daxuyanî tenê çend demjimêran piştî daxuyaniyeke bi heman rengî ya Serokwezîrê Brîtanî Keir Starmer, da.
Abela got:
“Helwesta me pabendbûna me bi hewildanên me yên ji bo bidestxistina aştiyeke mayînde li Rojhilata Navîn nîşan dide.”
Abela yekem car di meha Gulanê de planên xwe yên naskirina dewleta Filistînê ragihand û got ev yek dê di konferansa Neteweyên Yekbûyî ya di meha Hezîranê de pêk were, lê konferans paşê hate paşxistin.
Îrlanda, Norwêc û Spanyayê di meha Gulanê de Filistîn wekî dewletek serbixwe nas kirin.
Welatên Ereb û Tirkiyê bang li hamasê kirin ku çekan deyne
Li aliyê din di konferansa Neteweyên Yekbûyî de ku li New Yorkê hat lidarxistin, 17 welatan, Yekîtiya Ewropayê û Yekîtiya Erebî daxuyaniyek heft rûpelî îmze kirin.
Di daxuyaniyê de bang li Hamasê hat kirin ku çekên xwe deyne û dawî li desthilatdariya xwe ya li Xezayê bîne.
Di heman demê de piştgirî ji bo çareseriyek du dewletan ji bo nakokiya di navbera Îsraîl û Filistîniyan de hat nîşandan.
Di daxuyaniyê de wiha hat gotin:
“Divê Hamas çekên xwe radestî Desthilata Filistînî bike da ku şerê li Xezeyê bi dawî bibe.
Ev gav, ji bo armanca dewletek Filistînî ya serwer û serbixwe ye, divê bi “tevlîbûn û piştgiriya navneteweyî” were avêtin.
Di daxuyaniyê de her wiha êrîşa Hamasê ya 7’ê Cotmeha 2023’yan a li ser Îsraîlê şermezar kir û ji aliyê welatên erebî yên wekî Qeter, Erebistana Siûdî û Misrê ve hat îmzekirin.
Daxuyanî di roja duyemîn a konferansa Neteweyên Yekbûyî li New Yorkê de hat weşandin.
Di roja yekem a konferansê de, şandeya Filistînî ya li Neteweyên Yekbûyî jî bang li Îsraîl û Hamasê kir ku ji Xezeyê derkevin û destûrê bidin Desthilata Filistînî ku herêmê birêve bibe.
