Îsraîl li başûrê Lubnanê li herêma Nebatiyê êrişên asmanî pêk anî.
Li gorî artêşa Îsraîlê armanca êrişê baregehên Hizbullahê ye.
Li aliyê din jî zext li hikumeta Lubnanê tê kirin, da ku Hizbullahê bê çek bike.
Ajansa Nûçeyan a Neteweyî ya Lubnanê-NNA doh ragihand ku balafirên şer ên Îsraîlê li herêma Nebatiyê ya li başûrê welêt rêze êrîşên asmanî pêk anîne.
Artêşa Îsraîlê jî diyar kir ku êrîşên wan “xalên avêtina roketan” yên ku îdia dikin yên Hizbullahê ne li başûrê Lubnanê armanc kirine.
Li gorî Ajansa Nûçeyan a Neteweyî ya Lubnanê, artêşa Îsraîlê rêze êrîşên asmanî li Geliyê Nemiriyê yê li herêma Nebetiyê pêk anîne.
Piştî çend deqîqan, êrîşeke din a asmanî li Geliyê Huminê hate kirin.
Ji aliyê din ve, Berdevkê Artêşa Îsraîlê Avichay Adraee di daxuyaniya xwe ya li ser platforma civakî X’ê de diyar kir ku mewziyên Hizbullahê hatine armanckirin.
Adraee got:
“Hêzên Parastina Îsraîlê di demeke nêzîk de li gelek deverên başûrê Lubnanê êrîşên asmanî li gelek xalên avêtina roketan yên Hizbullahê pêk anîn.
Di dema êrîşan de, avahiyên leşkerî yên ku di van demên dawî de endamên Hizbullahê lê çalak bûne û binesaziya terorê ya zêde hatin tune kirin.”
Berdevkê artêşê îdia kir ku hebûna van xalên avêtinê, binpêkirina peymanên di navbera Îsraîl û Lubnanê de ye.
DYA û Îsraîl ji bo bêçekirina Hizbullahê zext li Lubnanê dike
Van bûyeran di demekê de qewimîn ku Îsraîl piştî peymana agirbestê ya di Mijdara 2024’an de di navbera aliyan de ketiye meriyetê, ji bo astengkirina ji nû ve avakirina kapasîteya leşkerî ya Hizbullahê piştî ziyanên giran ên di şer de, êrîşên asmanî li deverên cuda yên Lubnanê didomîne.
Li gorî peymanê, tê payîn ku artêşa Lubnanê li herêma sînorî bi cih bibe û Hizbullah di çarçoveya plansaziyeke ku ji aliyê hikûmetê ve hatiye qebûlkirin de, were bêçekirin.
Di çarçoveya planê de, tê çaverêkirin ku qonaxa yekemîn a ku başûrê Çemê Lîtanî yê nêzîkî 30 kîlometran ji sînor dûr e, heta dawiya salê ji aliyê artêşa Lubnanê ve bê temamkirin.
Ji aliyê din ve, Lubnan ji bo bê çekkirina Hizbullahê di bin zexta zêde ya ji aliyê Amerîka û Îsraîlê de ye.
Li gorî van zextan, rayedarên Lubnanî di destpêka mehê de Simon Karam ê berê balyoz tayîn kirin wekî nûnerê sivîl di civînên Komîteya Çavdêriya Agirbestê de ku Amerîka, Fransa, Neteweyên Yekbûyî û Îsraîl jî tê de ne.
