Beriya ku civînek navbera serokên Rûsya û Tirkiyê de pêk bê, Rûsya ragihand ku helwesta wan derbarê aloziya Sûriyê de neguheriye û şerê li dijî terorê wê dewam be.
Rejîma Sûrî jî piştrast kir ku dijminatiya dewleta Tirk li dijî serwerî û rêzdariya xaka Sûriyê ji bo berjewendiyên Erdogan in.
Rejîmê got:
Erdogan ne layiq e ku bibe yek ji garantorên Astanayê.
Ji bo lidarxistina civîneke navbera serokê Rûsyayê Viladîmir Putin û serokkomarê Tirkiyê Erdogan ya derbar Idlibê de ev bêhtîr hefteyekê ye hewldan tên kirin.
Lê beriya ev hevdîtin pêk bê, Rûsya helwesta xwe eşkere kir.
Kremlin: Helwesta me ji aloziya Sûrî neguheriye
Kremlin bi daxuyaniyekê got:
Helwesta Moskoyê ji aloziya Sûrî nehatiye guhertin.
Kremlin li ser dewamiya şerê li dijî çeteyên li Idlibê teqez kir û diyar kir ku Tirkiyê li gorî hevpeymana Sochî tev negeriya û sozên xwe têkildarî helandina çeteyan bi cih neanî.
Kremlin: Em nikarin ewlehiya balafirên Tirkiyê misoger bikin
Berdevkê Kremlin Dîmitrî Pîskov jî daxuyakirin ku “piştî rejîmê qada hewayî ya bakur û rojavayê Sûriyê girt, ew ê nikaribin ewlehiya balafirên Tirkiyê misoger bikin.
Tê payîn, ji bo rewşa Idlibê, 5 û 6’ê Adarê civînek çar-alî navbera Almanya, Fransa, Tirkiye û Rûsyayê were lidarxisitn.
Her dawî Rûsya ragihandibû ew ne bi niyet e tevlî van civînan bibe, lê li gorî Kremlin, dibe ku Putin û Erdogan li hev bicivin.
Rejîm: Erdogan ne layiq e ku bibe yek ji garantorên Astanayê
Li aliyekî din Rejîma Sûrî piştrast kir ku dijminatiya dewleta Tirk li dijî serwerî û hirmetiya xaka Sûriyê ji bo berjewendiyên Erdoganin û got:
Rejîma Erdogan nelayiq e ku bibe yek ji garantorên Astanayê.
Çavkaniyekî Wezaret Karên Derve ya rejîmê ji ajansa SANA’yê re axivî û destnîşan kir ku êrişên dewleta Tirk dîsa lawazbûna rejîma Erdogan bi rêya binpêkirin, nepêkanîna encamnameyên Astanayê û peymanên Sochiyê diyar dikin.
Her wiha israra wê ya mayîna di yek xendekê de bi komên terorîst re eşkere dikin.