Kongreya 7‘emîn a Yekitiya Nivîskarên Kurd li Sûriyeyê li bajarê Qamişloyê tê lidarxistin.
Yekitiya Nivîskarên Kurd li Sûriyeyê bi dirûşma “Nivîskarî berpirsyarî ye” kongreya xwe ya 7‘emîn li bajarê Qamişloyê li dar dixe. Kongre bi beşdariya nivîskar, rewşenbîr, helbestvan, hunermend, şêwekar û rexengiran li Parka Xwendinê ya bajarê Qamişloyê bi deqeyek rêzgirtin dest pê kir.
Axaftina destpêkê ji aliyê endamê Desteya Rêveber a Yekitiya Nivîskarên Kurd li Sûriyeyê Qadir Egîd ve hat kirin.
Qadir Egîd kongre li hemû rewşenbîran pîroz kir û got “Kongre di qonaxeke çarenûsî de ku Sûriyeyê û herêm tê re derbas dibin, tê lidarxistin. Ev qonax û guhertinên ku çêdibin berpirsyariyên giran datîne ser mile hemû rewşenbîr û nivîskaran. Em îro kom bûne da ku careke din peyama xwe bi peyvên durist, ramanên ronak û afrîneriya ku sînoran nas nake, ragihînin û bêjin, hebûna me ya li vir ne civînek ji rêzê ye, lê belê baweriya me ya kur bi vê yekê piştrast dike ku wêje û çand rih û henaseya neteweyan e.”
Qadir Egîd anî ziman ku rewşa çandî ya Sûriyeyê bi pirsgirkên mezin re rû bi rû ye û nivîskarên Kurd ji vê van guhertinan re dûr nin in û got: “Ev vê kongreyê bikin pêngaveke sereke û careke din ji cîhanê re îsbat bikni ku em gel bi gotinan tiştên ku ji ber şer wêran bûne, dîsa ava bikin.”
Qadir Egîd her wiha hêviya serketinê ji kongreyê re xwest û wiha dawî li axaftina xwe anî “Serketina vê kongreyê girêdayî xebata me ya koolektîf û hêza me ya derbaskirina nakokî û lawaziyan e. Xalên ku me tînin gel hev ji yên ku me ji hev dûr dixin, mezintir in.”
Endama Desteya Rewşenbîr û Nivîskarên Kurd li Sûriyeyê Şepal Seîd Yûsif jî kongre li beşdaran pîroz kir û hêviya pêşketinê kir.
Şepal Seîd Yûsif got: “Wekî tevgerên çandî û wêjeyî ji me hemûyan tê xwestin ku zimanê xwe biparêzin û pêş bixin. Divê em bi yek rihî kar bikin. Em hêvîdar in ku kongre bibe jêdera îlhamê ji hezkiriyên nivîsandinê û her nivîskarek bi hest û nêrîna xwe pêş bikeve. Hêviya serketinê ji me hemûyan re dixwazim.”
Piştî axaftinan peyamên pîrozbahiya kongreyê hatin xwendin. Piştre endamên rêvebirina kongreyê hatin hilbijartin.
Kongre ji ragihandinê re girtî dewam dike. Tê de rêzikaname tê xwendin û nîqaşkirin. Her wiha dê rapora du salan a yekitiyê were xwendin û rewşa wê ya rêxistinî were nîqaşkirin.
Di kongreyê de dê serok û cigar û 9 endamên nû yên Desteya Rêveber a Yekitiya Nivîskarên Kurd li Sûriyeyê werin hilbijartin û bi encamnameyekê bi dawî bibe.
