Dewleta Tirk li herêmên ku dagirkirine guhertina demografî dewam dike.
Niha jî dewleta Tirk li Serêkaniyê cih û saziyên pişaftinê ava dike.
Ji bo vekirina van saziyan jî doh Waliyê bajarê Rihayê Abdullah Erîn serdana Serêkaniya dagirkirî kir.
Dewleta Tirk a dagirker li bajarên Sûriyê yên dagir kirine, polîtîkayên Tirkkirinê didomîne.
Ji bo pêkanîna van polîtîkayên xwe jî, cih û saziyên pişaftinê ava dike.
Hat ragihandin ku duh Waliyê bajarê Rihayê Abdullah Erîn ji bo vekirina hin saziyên Tirkkirinê, serdana Serêkaniya dagirkirî kiriye.
Di nûçeya ku hatiye parvekirin de, tê gotin ku Waliyê Rihayê, beşdarî vekirina avahiya ku bi armanca qaşo meclisa taxê hatiye çêkirin, bûye.
Piştre serdana avahiya ku bi navê qaşo “Navenda Perwerdekirina Gel” ku ji aliyê saziya perwerdeyê ya bajarê Rihayê ve hatiye çêkirin, kir.
Ev sazî bi rêya hin karên weke porbir û terzîvaniyê, gelê heremê fêrî xwendin û nivîsandina zimanê Tirkî dike.
Waliyê Rihayê li xwe mikur tê ku wan ev sazî ji bo perwerdekirina jin û ciwanên Serêkaniyê çêkiriye.
Her wiha walî dibêje ku wan heta niha ji sedî 50 nasnameya Tirk dane şêniyên ku li Serêkaniyê dimînin.
Dewleta Tirk ne tenê li Serêkaniyê, heman polîtîkayên Tirkkirinê li Efrîn, Girê Spî, Ezaz û Cerablûsê jî dimeşîne.
21’ê Çileya 2020’an dewleta Tirk hezar û 500 malbatên çeteyên Sultan Mûrad û Lîwa El-Şam li Serêkaniyê bi cih kirin.
8’ê Nîsana 2020’an dewleta Tirk 19 basên tijî malbatên çeteyan ên ji Xûta, Idlib, Hims û gundewarê bakurê Helebê derbasî Girê Spî kir.
9’ê Hezîrana 2019’an jî dewleta Tirk 60 hezar kesên ji malbatên çeteyan derbasî Efrînê kir û ew li wir bi cih kirin.
