Konferansa Yekemîn a Jin a Tenduristiyê ya Bakur û Rojhilatê Sûriyê, ku duh li bajarokê Rimêlanê pêk hatibû, bi girtina biryaran ji aliyê komîteya tenduristiyê, derbarê pêşxistina qada tenduristiyê ya jinan, bi dawî bû.
Bi dirûşmeya”Jina tendurist, çavkanî û hêza jiyana tendurist e” Konferansa yekemîn a tenduristiyê ya jinan a Bakur û Rojhilatê Sûriyê bi beşdarbûna 124 endaman hat lidar xistin.
Xebatên konferans a tenduristiyê ya jinan bi xwendina rêziknameyên rêber Ocalan di derbarê tenduristiyê de, rapora salane û nîqaşkirina wê dewam kir.
Her wiha ji bo pêşxistina qada tenduristiyê ya jinan li herêmên Bakur û Rojhilatê Sûriyê pêşniyar hatin kirin û wekî biryar di dawiya konferansê de hatin girtin.
Piştî nîqaşan, Meclisa Tenduristiyê ya Jinan a Bakur û Rojhilatê Sûriyê ku ji 21 endaman pêk tê, hate avakirin.
Konferans bi wergirtina biryaran bi dawî bû û biryar wiha ne:
-Perwerdeya pîşeyî û fikirî wezîfeya sereke ya xebatên qada tenduristiyê ye.
-Dê perwerdeyên fikirî werin vekirin, komîteyên dayîna perwerdeyê li tevahî herêman werin avakirin da ku encamên baş pêk bîne.
-Bi armanca dabînkirina desteka dirûnî li hin herêman, kadroyên Heyva Sor a Kurd û navendên tenduristiyê werin birêxistinkirin.
-Bernameyên tenduristiyê werin amadekirin û li ser dezgehên ragihandinê werin belavkirin.
-Dê tiba xwezayî were pêşxistin û birêxistinkirin û li gorî derfet û pêwîstiyan cihên taybet jê re werin veqetandin.
-Nexweşxaneyeke taybet a jinan li herêma Cizîrê were vekirin.
-Beşek taybet a welidandinê li herêmên Kesrat û Siwer ên Dêrazorê werin vekirin.
-Di hemû nexweşxaneyan de beşê jinan werin vekirin.
-Navendeke keşifkirina bi lez a penceşêra pêsîran li hemû kantonan werin vekirin.