Şêniyên Şêladizê jî bi dirûşma “Azadî Azdî” tevlî xwepêşandanan bûn.
Di xwepêşandanên duh êvarî li bajarê Silêmaniyê de jî, ciwanek bi guleyên hêzên ewlehiyê hat kuştin.
Şandeyeke rêvberiya Başûr ji bo çareserkirina pirsgirêka aborî digel rayedarên Iraqî civiya.
Pêla xwepêşandanên gelê Başûrê Kurdistanê yên li dijî gendeliya desthilatê, bilindtir û şaxê xwe berdide bajarên din.
Piştî Silêmanî û navçeyên wê, Dihok jî tevî girtin û binçavkirinê, radibe ser pêyan.
Şêniyên bajarokê Şêladizê li nava bazarê kom bûn û bênavber dirûşma “Azadî Azadî” qîr kir.
Asayîşa PDK’ê ciwanekî êla Rêkanî birîndar kir û piştre girt
Li gorî agahiyan, PDK’ê da ku xwepêşandan li dar nekeve, gelek ciwanên êla Rêkanî girtine.
Her wiha di dema serdegirtina malan de, ciwanê bi navê Kovan bi guleyê hat birîndarkirin û tevî birîna xwe jî, hat girtin.
Ciwanekî din li Silêmaniyê hat kuştin û 3 jî birîndar bûn
Li bajarê Helebce û bajarokê Erbet ê Silêmaniyê jî duh saetên şevê şênî daketibûn qadan.
Di dema xwepêşandanê de, ciwanek bi guleyên hêzên ewlehiyê hate kuştin û 3 jî hatin birîndarkirin.
“Divê hikûmeta Başûr û Iraqê bersivê bidin daxwaziyên rewa yên xwepêşanderan”
Di vê derbarê de, Komîsyona Bilind a Mafên Mirovan a Iraqê bi daxuyaniyekê ragihand ku çavdêriya hemû bûyerên li Silêmaniyê kiriye û bûyer yek bi yek hatine belgekirin.
Komîsyonê bang li hikûmeta Başûr û Iraqê kir ku bersiva daxwaziyên rewa yên xwepêşanderan bidin.
Komîsyonê her wiha bang li hêzên ewlehiyê kir ku digel xwepêşanderan hemaheng bin û mafên wan biparêzin.
Şandeyeke Başûrê Kurdistanê digel wezîrê darayî û petrola Iraqî civiya
Ji bo çareserkirina qeyrana aborî jî, şandeyeke hikûmeta Başûrê Kurdistanê bi serkêşiya Qubad Talebanî li Bexdayê digel wezîrê darayî û petrolê yên Iraqê civiyan.
Şandeyê di civînê de amadekariya xwe ragihand ku digel Iraqê li hev bikin.
Piştî civîna rêveberiya Başûr a vê dawiyê, biryar hatiye standin ku şandeyeke siyasî biçe Bexdayê, da ku pirsgirêka aborî çareser bikin.
Heta niha ji ber bikaranîna tundiyê li dijî xwepêşanderan, 8 sivîl hatine kuştin û zêdeyî 60 jî birîndar bûne.
