Tevî redkirina hemû insiyatîfên ji bo çareserkirina alozaya heyî, Hikumeta Şamê ji ya xwe danakeve û ji plan û siyaseta xwe ya reşkirinê jî naqere. Rûspiyên eşîran ên herêmê her û her li dijî van planan xwedî helwest in û red dikin. Rûspiyan careke din gel li ser hewldanên fitneyê yên hikumeta Şamê bi rêya hin kesan, hişyar kir û piştrast kir ku kesên wiha xwefiroş in û li pey pereyan diçin.
Pêngaveke nû li dijî Rêveberiya Xweser hatiye destpêkirin, armanc jê jî sorkirina eşîrên herêmê li dijî Rêveberiyê û têkbirina projeya wê ya biratiya gelan e.
Ya ku vê pêngavê bi rêve dibe jî, Hikumeta Şamê ye.
Hikumeta ku aramî û ewlehiya ku heta niha herêm tê re derabas dibe, tehmûl nake û bi rêya sîxur û xwefiroşan dixwaze herêmê tev li hev bike.
Eşîr û rûspiyên herêmê jî vê yekê tekez dikin û her ji van planan hişyar in.
Rûspiyê Êzidî Faris Şemo yek ji wan rûspiyan e ku di ferqa van planan de ye û siyasetên berê jî yên hikumetê bi bîr xistin.
Şemo destnîşan kir ku hikumeta Şamê îro xwe dispêre derxistina fîtneyan di nava pêkhateyan de, da ku jiyana hevbeş, biratiya gelan û aştiya navxweyî têk bibe û banga hevgirinê li dijî van planan kir.
Ji rûspiyên eşîra Şiêtat a rojhilatê gundewarê Dêra Zorê Sabit Hemad El-Îd jî li ser wan siyasetan dibêje:
“Tu tişt bi navê rejîmê tune ye, tiştê mayî jî tenê şeklî ye.
Bûyerên li herêmê rû didin siyasetek ji çêkirina Rûsya û Îranê ye.
Herdu alî rasterast siyaseta li welat û aliyê wê yê leşkerî bi rê ve dibin û destdirêjiyê li milkên wê dikin.”
Hikumeta Şamê, ne diyalog û danûstandinan qebûl dike û ne jî herêmê ji pêkhate û gelên wê re dihêle û niha planên xwe bi kesên girêdayî xwe dimeşîne.