Li Idlibê di van rojên dawiyê de şer her diçe gur dibe. Hêzên hikumeta Şamê cih û deverên artêşa Tirk û d çeteyên wê topbaran kirin, li Derayê jî 2 leşkerên hikumetê hatin kuştin.
Çavdêriya Sûrî ya Mafên mirovan ragihand ku Hêzên Hikumeta Şamê derdora cihên artêşa Tirk yê li gundê Serca yê li Cebel El-Zewiyê topbaran kir.
Artêşa Tirk û çeteyên wê jî deverên hêzên hikumetê yên li Kefer Nibil û yên din li başûrê Idlibê hedef girt.
Her wiha hêzên hikumetê deverên El-Enkawî û Ziyare yên li Sehil El-Xab ên li bakur-rojavayê Hemayê topbaran kirin.
Çavdêriyê diyar kir ku çeteyan êrîşî cihên hêzên hikumetê yên li eniya Marat Herma ya li başûrê Idlibê kirin.
Li Derayê 2 leşkerên hikumeta Şamê hatin kuştin
Li derdora bajarokê Dêr Edes yê li Bakurê Derayê jî mayînek bi weseyateke hêzên hikumetê Şamê ve teqiya.
Li gorî Çavdêriya Sûrî,di encama teqînê de 2 leşker hatin kuştin, 2 jî birîndar bûn.