8 rojin, bi hezaran kes li bin kavilên erdhejê mane. Roj derbas nabin ku ev êş giran tir nebe. Jimara kesên heta niha jiyana xwe ji dest dane nêzî 32 hezarî bûye. Hemwextî vê bi îdiaya dizî û talanê dîmenên êşkenceyê yên wehşetê derdikevin. Tîmên biyanî jî bi yek bi yek ji ber rewşa heyî ji Tirkiyê derdikevin.
Piştî erdheja bakurê Kurdistanê û xemsariyê rejîma Tirkiyê, rewşa derketî kembaxî ye.
6’ê Sibatê li navçeya Bazarcix a Mereşê bi pileya 7,8 û 7,6 bandoreke zêde li 10 bajarên bakurê Kurdistan, Tirkiyê û Sûriyê kirin.
Bi ser erdhejê re 8 roj derbas bûn û her ku diçe bilançoya erdhejê giran dibe.
Li gorî daxuyaniya AFAD’ê ya dawiyê hejmara kesên jiyana xwe ji dest dane derket 31 hezar û 643’an.
Piştî van erdhejên bibandor 2 hezar û 724 erdhejên biçûk jî pêk hatine.
Mexdûrên erdhejê ji rejîma Tirkiyê bihêrsin
Mexdureke erdhejê yê li Hatayê ji ber xemsariya Serokomarê AKP’î Erdogan û zavayê wî bertekên tund nîşan da.
Mexdur gotinên zavayê Erdogan, Berat Albayrak yên digot, welat difire bibîr xist û got: Hûn dizanin bi 5 hezar parêzvanan re bimeşin. Hûn li kurin. Em tenê, em bi xwe bi xwe li virin.
Bi hinceta diziyê Sûrî û Efxanî têne kuştin
Di demek ku gel hesabê ji berpirsyarên dewleta Tirk dixwest, hikumetê bi rêbazên şerê taybet hêrs û kîna gel veguherand.
Gel li benda rizgarkirinê bû, lê desthilatê bi rêbaza şerê taybet nûçeyên derew belavkir û dest bi êşkenceya mirovên bê guneh kir.
Heta niha bi êşkenceyan 4 kes hatine qetilkirin.
Ji ber metirsiya ewlekariyê komên biyanî ji Tirkiyê derdikevin
Tevî ku piştî erdhejê hejmara personelên ku ji aliyê welatên din ve şandin Tirkiyê nêzî 10 hezarî bû jî, di van rojên dawî de hin welatan ji ber fikarên ewlekariyê komên xwe paşde dikişînin.
Tîmên biyanî tevî xebatên lêgerîn û rizgarkirinê alîkariya bijîşkî û yên din pêşkêş dikin.
Piştî Şemiyê Îsraîlê bi hinceta ewlekariyê hêzên xwe ji welat vekişand, tîmên Awisturya berê xwe dan welatê xwe.
Tê îdiakirin ku ji ber tundiya li herêmê Meksîka jî tîmên xwe vekişandiye.
Lê heta niha ev agahî ne hatiye piştrastkirin.
Li aliyekî din, Almanya, Spanya, Yewnanîstan û Swîsre bi hinceta ku karê xwe qedandine vegeriyane welat.
