Wezîrê Derve yê Almanyayê Johann Wadephul dibêje divê Almanya rêberiya NATO’yê bike.
Wadephul got eger lêçûnên parastinê neyên zêdekirin, Almanya wê di pêşerojê de “ne ewle” be.
Wezîrê Derve yê Almanya Johann Wadephul têkîldarî rola Almanya di NATO’yê de nirxandin kir.
Di hevpeyvînekê de bi kovara Spiegel re, Wadephul got:
“Divê Almanya bibe mînak, divê em amade bin ku pêşengiyê bikin.
Ev ji bo ewlehiya Almanya û hevpeymaniyê girîng e.”
Wezîr Wadephul diyar kir ku divê mijara parastinê di nav Almanya de bêtir were nîqaş kirin, û got:
“Divê em bêtir li ser ewlehiya xwe biaxivin.
Divê em bi zelalî ji welatiyên xwe re bêjin ku bêyî bernameyeke razemeniyê ya mezin di parastina me de, Almanya û Ewropa wê di pêşerojê de ewle nebin.”
Wezîr Wadephul teqez kir ku ji bilî wergirtina bêtir personel ji bo artêşê, divê parastina sivîl jî bi girîngî were xurt kirin, û wiha got:
“Qonaxa duyemîn a xala werçerxê dest pê dike.”
Serokwezîrê berê yê Almanya Olaf Scholz di axaftina xwe ya dîrokî de ku bernameyeke çekdarî ya 100 milyar euroyî ji bo artêşa Almanya piştî dagirkirina Ukraynayê ji aliyê Rûsyayê ve ragihand, peyva xala werçerxê bi kar anî.
Wezîrê Parastinê yê Almanya Boris Pistorius ragihand ku artêşa Almanya di çarçoveya planên NATO’yê yên ji bo zêdekirina qebiliyetên parastinê de pêdivî bi 60 hezar leşkerên nû heye.
Niha nêzîkî 181 hezar leşkerên artêşê di erkê çalak de ne.
Armanca Nato’yê ji sedî 5 lêçûnên parastinê ye
Her wiha Wadephul got ew bawer dike ku lîderên NATO’yê wê li hev bikin ku lêçûnên parastinê bigihînin ji sedî 5 ji hilberîna navxweyî ya giştî.
Lîderan wê di Civîna Bilind a NATO’yê de ku wê di 24-25ê Hezîranê de li Den Haag, Holandayê were lidarxistin, li ser zêdekirina lêçûnên parastinê nîqaş bikin.
Armanca fermî ya lêçûnên hevpeymaniyê niha ji sedî 2 ye.
Ji bo zêdekirinê dengdana bi yekdengî pêwîst e, lê Spanya, ku di hevpeymaniyê de bi ji sedî 1.3 herî kêm beşdarî parastinê dibe, li dijî armanca nû derdikeve.
Wadephul di Civîna Wezîrên Derve yên NATO’yê de ku meha borî li Antalyayê hate lidarxistin, piştgiriya xwe ji bo vê armancê nîşan dabû.
Mesrefên parastinê yên Almanya û Tirkiyeyê hinekî ji sedî 2 ji wan bilindtir in.
