Serokê Rûsyayê Vladîmîr Pûtîn, hişyarî da ku divê hêzên Ukraynayê ji herêma Donbasê ya li rojhilatê Ukraynayê paşve vekişin.
Putîn dibêje wekî din Rûsya wê vê herêmê bi zorê bigre.
Pûtîn di hevpeyvîna xwe ya bi India Today (indiya tudey) re wiha got:
“Yan em van axan bi zorê rizgar bikin yan jî hêzên Ukraynayê van axan biterikînin.”
Moskow niha nêzîkî ji sedî 85’ê Donbasê kontrol dike.
Putin: Yan hêzên Ukraynî ji Donbasê paşve bikişin yan jî bi zorê bistînin
Serokê Ukraynayê Volodîmîr Zelenskî, radestkirina axê qebûl nake.
2’yê Kanûnê, nûnerên Amerîkî û Rûsî li Moskowê li ser plana aştiyê ya Ukraynayê civiyan.
Piştî wê, Serokê Amerîkayê Donald Trump got muzakerevan bawer dikin ku Pûtîn “dixwaze şer bi dawî bibe”.
Wezîrê Karên Derve yê Ukraynayê Andrîy Sîbîha jî dibêje divê Rûsya “xwînrijandinê rawestîne” û Pûtîn bi windakirina demê tawanbar kir.
Kîev û hevkarên wê yên Ewropî bawer dikin ku rêya herî bi bandor a pêşîgirtina êrişeke nû ya Rûsyayê di pêşerojê de, eger peymana aştiyê çêbibe jî, dayîna endamtiya NATO’yê ji Ukraynayê re ye.
Rûsya bi tundî li dijî pêşniyazeke wiha ye û Trump jî gelek caran gotiye ku niyeta wî tune ye Kîev bibe endamê NATO’yê.
NY: Di şerê kraynayê de em nahesin ku nêzîkî agirbestê ne
Li gel van geşedanan Koordînatorê Alîkariya Mirovî ya Neteweyên Yekbûyî yê Ukraynayê Matthias Schmale (matiyas şimale) li Navenda Giştî ya Neteweyên Yekbûyî ya li New Yorkê civîna rojnamevanî lidar xist.
Matthias Schmale dibêje şerê li Ukraynayê bêyî tu nîşaneyên pêşveçûnê ber bi agirbestê ve, bê navber didome û zivistan û zêdebûna wêraniyê metirsiyên mirovî zêde dike.
Schmale bal kişand ser serdanên xwe yên pir caran yên herêmên şer û wiha got:
“Em hîs nakin ku nêzîkî agirbestê ne. Şer bêhna xwe nagire, didome û bi rastî wêranîyeke mezin çêdibe.”
Schmale bi taybetî bal kişand ser zivistan û armanckirina binesaziya enerjiyê di pevçûnan de û got:
“Em ji senaryoya kabûsê ditirsin ku di nava zivistaneke sar de, mirov li bajaran, di avahiyên bilind de asê bimînin, ji ber ku wêrankirina enerjiyê didome û tamîrkirin nikare li pey wê bigere.”
Di riya daketina Zelenskî ya îrlandayê de 4 dronên leşkerî yên nenas hatin dîtin
Li aliyê din di destpêka hefteyê de, di dema serdana Zelenskî ya Îrlandayê de, derket holê ku 4 dronên leşkerî yên ku ji ku derê hatine û kî rêve dibin naye zanîn, ketine rêya daketina balafira Zelenskî.
Balafira Zelenskî çend deqe berî dema plankirî li Balafirgeha Dublînê daket, lê tam di saeta ku balafir dihate payîn de, di riya nêzîkbûna pistê ya ku wekî qada qedexeya firînê hatibû ragihandin, 4 dron xuya bûn.
Çend deqe piştî daketina balafirê saet di 11’ê şevê de, dron piştî bûyerê li ser keştiyên hêza deryayî ya Îrlandayê firîn.
Rayedarên hukûmetê gotin ku dronan nêzîkî 2 saetan di hewayê de man.
