Di Rojhilata Navîn de ku projeya veguherîna bi pêşengiya Amerîka-Îsrail gav bi gav pêk tê, nûnerên Îsrail û Lubnanê piştî 24 salan cara yekem li hev civiyan.
Civîn di çarçoveya mekanîzmaya civînên mehane yên leşkerî yên ku di çarçoveya peymana agirbestê de têne lidarxistin, hate kirin.
Li gorî nûçeya Axiosê (aksiyos), her du alî li ser xeta sînor projeyên hevbeş ên biçûk gotûbêj kirin.
Berpirsekî Amerîkî got Washington dixwaze li ser sînor “Herêma Aborî ya Trump” ku ji Hizbullah û çekên giran bêpar bê avakirin.
Berdevkê Hikûmeta Îsrailê Shosh Bedrosian (şoş bedrosiyan) diyar kir ku ev civîn beşek ji vîzyona Netanyahu ya “guhertina Rojhilata Navîn” û “ji nû ve sêwirandina herêmê” ye.
Netanyahu jî ev civîn wekî “gava yekem a ji bo bingeha hevkariya aborî di navbera Îsrail û Lubnanê de” bi nav kir.
Serokwezîrê Lubnanê Newaf Selam jî diyar kir ku di vê qonaxê de avakirina pêwendiyên dîplomatîk û aborî bi Îsrailê re ne mumkun e.
Selam teqez kir ku ji bo normalbûnê şertekî tenê heye: avakirina dewleteke filistînî ya serbixwe.
“Civînên bi Îsrailê re erênî ne, armanc pêşîgirtina şerê duyemîn e”
Her wiha Serokkomarê Lubnanê Joseph Awn doh di daxuyaniya xwe de got civînên li ser mekanîzmaya şopandina agirbestê di navbera Lubnan û Îsrailê de bi erênî derbas bûne.
Joseph Awn dibêje armanca bingehîn pêşîgirtina şerê duyemîn e.
Nûnerên Lubnan û Îsraîlê bi beşdariya unfil’ê civiyan
Di dema ku fikarên destpêkirina êrîşeke mezin a Îsrailê didomin, du nûnerên sivîl ên Lubnanî û Îsraîle Çarşema borî li baregeha UNIFIL’ê beşdarî civîna komîteya mekanîzmaya agirbestê bûn.
Ev gav wekî yekem têkiliya rasterast a di navbera her du welatan de piştî bi dehsalan hate tomar kirin.
Serokkomarê Lubnanê teqez kir ku armanca civînan ne armanckirina tu komên civakî ye, lê parastina hemû Lubnanê ye û got:
“Heta niha bersiv erênî ne. Divê em vê yekê ji bo dûrxistina siya şerê duyemîn ji Lubnanê bi kar bînin.”
“Civînên naqurayê tenê li ser ewlehiyê ne”
Awn diyar kir ku talîmatên daye Simon Karam “bi temamî li ser mijarên ewlehiyê” ne û wan wiha rêz kir:
“Rawestandina êrîşên Îsrailê, vekişîna ji xalên dagirkirî, diyarkirina sînoran,berdana girtiyan e.”
Serokkomarê Lubnanê dibêje şandeya ku hatine wê herin başûr ji bo lêkolîna li cihê xebatên artêşa Lubnanê ku tê çaverêkirin heta dawiya salê qonaxa yekem a rakirina tesîsên leşkerî yên Hizbullahê biqedîne.
Wezîrê Ragihandinê Morkos diyar kir ku civînan ne hevkariya aborî ne jî peymana aştiyê nagire nav xwe û got:
“Civînên Naqurayê tenê li ser ewlehiyê ne.”
