Li Fîlîpînê, bîlançoya tayfûna Raî giran dibe. Li vî welatî herî kêm 388 kesî jiyana xwe ji dest dan. Li Malezya ku cîranê Fîlîpînê ye, 33 hezar kes ji bo cihên ewle hatin veguhestin. Jimara kesên jiyana xwe ji dest dane jî derket, 47’an.
Li parzemîna Asya bagera Raî bandoreke zêde li welatên gravî kiriye.
Yek ji welatên herî zêde ji vê bagerê bandor bûye jî Fîlîpîn e.
Li gorî daxuyaniya Parastina Sivîl, hejmara mirovên ku ji ber bagera Raî jiyana xwe ji dest dane gihiştiye 388’an.
Her wiha 60 kes jî winda ne.
Di bîlançoya beriya niha de hatibû ragihandin ku 375 kesan jiyana xwe ji dest dane.
Bagera Raî bi leza di saetê de 195 kîlometreyan bipêşde diçû.
Bagerê 16-17’ê Kanûnê bandor li başûr û navenda Fîlîpînê kir.
Li her devera ku bager têre derbas bû, banê xaniyan hilweşiya, dîrekên elektrîkê û dar ji şûna xwe rabûn û bi sed hezaran mirov bêmal mabûn.
Hate ragihandin ku derdora 482 hezar xanî ji ber bagerê xera bûn an jî xisar lê bû.
Li 430 bajar û gundan alîkarî li zêdeyî 4 milyon kesî tê belavkirin.
Hîn jî zêdeyî 300 hezar kes li kampên veguhastinê dimînin.
Hikumetê xurek, av û kinc bir herêmên ku tayfûnê bandor lê kirin.
Rojên dawî gefeke nû rû da.
Herî kêm 140 kes ji ber ava gemarî nexweş ketin.
Fikar hene ku şewbeke nû rû bide.
Li Malezya ku cîranê Fîlîpînê ye rewş hemane.
Ji ber lehiyê 47 kesan jiyana xwe ji dest dan
Barana zêde ya li welat li pey xwe wêraniyek zêde hişt.
Her wiha ji ber karaseta rûdayî jî jimara kesên jiyana xwe ji dest dane derket 47’an.
Li gorî nûçeya Asian News International (ANI) li Malezyayê ji ber barana ku ji 17’ê Kanûnê ve 3 roj bi bandor bû, gelek herêm di bin avê de man.
Rayedarên polîsan diyar kirin ku hejmara kesên di lehiyê de jiyana xwe ji dest dane derket 47’an.
Her wiha lêgerîna ji bo 5 kesên winda jî dewam dike.
Piraniya wan ji parêzgeha Pahang nêzîkî 33 hezar kes ji bo cihên ewle hatin veguhestin.
Hikûmet ji ber ku beriya baranê hişyariyên pêwîst nekiriye tê rexnekirin.
