Di sala 2021’an de 497 jin li Tirkiyê hatin kuştin

Platforma Em ê Cînayetên Jinan Rawestînin diyar kir ku di sala 2021’an de li Tirkiyê 280 jin ji aliyê mêran ve hatin kuştin û 217 jin jî bi awayek guman jiyana xwe ji dest dane.

Platforma Em ê Cînayetên Jinan Rawestînin (KCDP) rapora xwe ya 2021’an eşkere kir.

Li gorî raporê di sala 2021’an de 280 jin ji aliyê mêran ve hatine kuştin û 217 jin jî bi awayek guman jiyana xwe ji dest dane.

Ji 280 jinên hatin kuştin, 33 jinan serî li polîs û dozgeriyê daye û gilî kirine.

Li gorî raporê:

Tevî 33 jinan serî li rayedaran da û ji ber ku rayedaran peywîra xwe bi cih neanîn ji aliyê mêran ve hatin kuştin.

Ligel giliyên jinan jî rayedaran jin neparastin.

Di sala 2021’an de bi dehan jinên mafên xwe yên rewa bikaranîn, hatin destgîrkirin û der barê wan de doz hatin vekirin.

Di raporê de hate gotin, “Kujerê jinan hêzê ji rayedaran distînin. Kujer nayên cezakirin û hêzê ji polîtîkaya rayedaran distînin.”

Li gorî bilançoya meha kanûnê jî 30 jin hatin kuştin û 21 jin jî bi awayek guman jiyana xwe ji dest dan.

Platforma em ê Cînayetên Jinan Rawestînin: Ji sedî 64 jin di malên xwe de hatin kuştin

Li gorî rapora KCDP a 2021’an bûyerên kuştina jina wiha ye.

Ji 280 jinan, 125 jin ji aliyê hevjînê xwe ve, 37 jin ji aliyê hevalê xwe yê mêr ve, 24 jin ji aliyê nasê xwe ve ,21 jin ji aliyê hevjînê xwe yê berê ve,16 jin ji aliyê xizmên xwe ve û 11 jin ji kesên ku ew kuştine, xizmatiya wan nehat zanîn.

178 jin di mala xwe de, 33 jin di kolanê de, 12 di zeviyê de, 10 jin li cihê kar, 9 jin di wesayîtê de, 2 jin diketina avahiyê de, 2 jin li parkê, cihê mirina 10 jinan jî nehat tespîtkirin.

Di sala 2021’an de ji sedî 64 jin di mala xwe de hatin kuştin.

Back to top button