Ji parêzerên Buroya Hiqûqê ya Sedsalê a ku parêzeriya Rêber Apo dike, Rezan Sarica bal kişande li ser tecrîda li Îmraliyê û berxwedana Rêber Apo. Rezan Sarica, diyar kir ku Rêber Apo 23 sal in li Îmraliyê bi vîneke pir xurt li ber xwe dide û ji bo ku hevdîtin pêk were bang li herkesî kir ku erk û berpirsyariyên xwe rabin.
Ji 25’ê Adara 2021’ê heya niha agahî ji Rêber Apo û girtiyên din ên li Îmraliyê nayên girtin.
Ji ber vê herî dawî parêzeran di 24’ê Kanûna 2021’ê de bi daxwaza “tevdîrê” serî li Dadgeha Qanûna Bingehîn dabûn.
Ji parêzerên Buroya Hiqûqê ya Sedsalê Rezan Sarica tecrîda giran ya li Îmraliyê û serlêdanên li saziyên navneteweyî hatin kirin, ji Ajansa Mezopotamyayê re nirxandin.
Sarica, bibîr xist ku bi tu awayî agahî ji Rêber Apo û her 3 muwekîlên xwe yên din ên di Girtîgeha Îmraliyê de nagirin.
Sarica, destnîşan kir. ji ber ku xeberê ji muwekîlên xwe nagirin û ji bo tecrîda li Îmraliyê demildest bi dawî bibe serî li gelek rêxistinên civaka sivîl, baro, dadgeh û Îdareya Girtîgeha Îmraliyê dane û hîn jî didin.
Sarica anî ziman nêzî 10 meh in ew tu agahî ji Îmraliyê nagirin û lewma ew bifikar in.
Sarica, diyar kir ku ji bo hevdîtinê ew û malbat her hefte serî li Serdozgeriya Komarê ya Bûrsayê û îdareya girtîgehê didin û got: “Serlêdanên me yên heya sala 2016’an bi awayekî devkî dihatin bersivandin.
Lê ev salek du sal e, serlêdanên me bi tu awayî nayên bersivandin.
Bi taybetî piştî 2016’an bi biryara dadgehê ya dijhiqûqî mafên nivîsandin-pêwendîdanînê jî di nav de hemû maf hatin qedexekirin.”
Sarica îşaret bi biryarên dadgehê yên mîna qedexeya hevdîtîna bi parezaran re dike û dibêje, ti aliyê wê yê hiqûqî nînin û kêfî ne.
Sarica, destnîşan kir ku sedema van qedexeyan û biryarên qedexeker jî ew e ku dewlet bi tu awayî naxwaze tiştek ji Îmraliyê derkeve.
Sarica, derbarê serlêdanên wan ên li Dadgeha Destûra Bingehîn-AYM’ê û CPT’yê jî, da zanîn heta niha bersivek nehatiye dayîn.
Rêzan Sarica: Sekna Ocalan ya li Îmraliyê hîmê bingehîn yê Demokrasî û Azadiyê ye
Sarica, li ser şert û mercên giran yê li Girtîgeha Îmraliyê jî anî ziman ku Rêber Apo li Îmraliyê berxwedaneke bêhempa nîşan dide û got, sekna wî hîmê bingehîn ê demokrasî û azadiyê ye.
Parêzer Rezan Sarica, di dawî de ji bo agahî ji Rêber Apo were girtin û hevdîtîn pêk werin, bang li raya giştî kir ku bi berpirsiyariya xwe rabin.
