Operasyona “Mirovî û Ewlehiyê” ya li dijî şaneyên DAIŞ’ê li Kampa Holê, dewam dike. Di pêngavê de berpirsa yekem a şaneyên DAIŞ’ê, hat girtin. Jina DAIŞ’î li xwe mikur hat ku wan ji bo kuştina mirovan, li Kampê “Tabûra Ensar El Efîfat”ava kirine û gelek sûc kirine.
Qonaxa duyemîn a Pêngava Mirovî û Ewlehiyê ya li Kampa Holê, dewam dike.
7’ê Îlonê di encama operasyoneke taybet de jineke DAIŞ’î ya bi navê Riweyda Hemud Salim ku berpirsa yekem a şaneyên DAIŞ’ê yên li kampa ye, hat girtin.
Jina DAIŞ’î li xwe mikûr hat ku wê ji sala 2019’an û heta niha li kampê gelek bûyerên kuştinê pêk anîne û cenazeyên kuştiyan jî avêtine kanalîzasyonan.
Her wiha ji bo kuştina niştecihên kampê koma çeteyan a bi navê ‘Tabûra Ensar El Efîfat’ ava kiriye.
Jina DAIŞ’î Riweyda Salim ya 33 salî a Iraqî, di sala 2014`an de dema DAIŞ êrişî Mûsilê dike, bavê wê ji aliyê DAIŞ’ê ve tê revandin û hevjînê wê tevlî DAIŞ`ê dibe.
Paşê bi hevjînê xwe re tevî 2 zarokên xwe derbasî Sûriyê dibe. Hevjînê wê yê çete li Baxozê winda dibe.
Li gorî mikurhatinên serçteyê, Şaneyên veşartî li kampa Holê bûyerên kuştinê li ser 2 beşan dimeşînin; şehîdxistina hêzên ewlekariyê û kuştina kesên ku li gorî hişmendiya DAIŞ’ê tevnagerin.
Di bûyerên kuştinê de şaneyên veşartî 2 kom ava kirine; koma îstixbaratê û koma kuştinê.
Riweyda Salim berpirsa koma kuştinê bû.
Di nava kampê de navên wiha li xwe kiribû; Um Omar, Um Tîcan, Um Cuma, Um Omara û Um Cuneyd.
Li gorî Hêzên Ewlekariya Hundirîn wê bi dehan kes li kampê kuştine.
Serçeteyê diyar kir ku wan li kampê jinek bi çakuçan kuştine û cenazeyê wê avêtine kanalîzasyonê.
Her wiha di kuştinan de demançeya bêdeng ku ji wan re ji derve anîne kampê, bikar anîne.
Riweyda bi riya çeteyê bi navê Cerrah li kampê cih ji şaneyan re ava kiriye û çek ji wan re birine.
Derbarê derbaskirina çekan ji kampa Holê re jina DAIŞ’î ev agahî da: “Çekên me bi rêya Cerrah dihatin kampê.
Ew çek min ji Um Farûq bi rêya telefonê werdigirtin.
Me cihek di bin erdê de çêkir ku hemû çekên xwe tê de veşart.
Di bûyerên kuştinê de em 3-4 kes diçûn.
Kesên ku Hêzên Ewlekariyê lê digeriyan me hîzam ango yêlekê teqemeniyê li wan dikir, ku ev hîzam li ser min jî hebû.
Hêzên Ewlekariyê gelek caran hatin operasyon çêkirin lê em her direviyan.
Ger ji min hatiba xwestin min ê bi hîzama teqemeniyê xwe biteqandiba.”
