Mezintirîn êrişa 50 salên dawî li dijî Îsraîlê doh ji aliyê Hamasê ve pêk hat.
Û encama vê êrişê her diçe giran dibe.
Li gorî daneyên dawî 300 Îsraîlî hatin kuştin û hezar û 600 jî birîndar bûn.
Li Xezayê jî ji ber êrişa dijber a artêşa Îsraîlê, herî kêm 250 Filîstîn hatin kuştin.
Ji gef û daxuyaniyên Tel Avîvê diyar dibe ku şerê di navbera aliyan de pir dijwar bibe.
6’ê Cotmeha sala 1973’an bi pêşengiya Misir û Sûriyê, şereke mezin li dijî Îsraîl pêk hat.
Şer dema Îsraîl cejna xwe a olî ya binavê Yom Kippur yan jî li gorî cîhana Erebî “Şerê Roja Xifranê” destpê kir.
Di salvegera vî şerî de, Hamasê li dijî Îsraîlê bi navê “Tofana El Eqsa” êrişeke mezin pêk anî.
Ji ber vê yekê êrişa doh weke mezintirîn êrişa li dijî Îsraîlê ya 50 salên dawî tê binavkirin.
Ji xwe ji encamên wê jî ev rastî diyar dibe.
Di nava çend saetan de bêtirî 300 Îsraîlî hatin kuştin, hezar û 600 birîndar bûn.
Li gorî çavkaniyên Îsraîlê derdora 100 leşker û sivîlên wan ji aliyê Hamasê ve dîl hatine girtin.
Bermaberê vê êrişê Îsraîlê jî bi navê “Şûrê ji Hesin” operasyoneke mezin li dijî Xezayê destpê kir.
Ji doh ve Îsraîl ji erd û ezman bajarê Xezayê dide ber top û bombeyan.
Îsraîl bi “şûrên ji hes in” bersivê dide hamasê
Serokwezîrê Îsraîlê Benyamîn Netanyahu têkildarî êrişa Hamasê daxuyaniye nû da û got;
7’ê Cotmehê ji bo Îsraîlê “roja reş e”.
Artêşa me bi hemû hêza xwe wê şer bike û heta Hamas were tinekirin wê ev şer ranewest e.
Em ê bi hemû hêza xwe li Hamasê bidin û wan jiholê rakin.
Îsraîl hêzên xwe li ser sînorê Lubnanê jî kom kirin
Di vê navberê Hîzbulllah a Lubnanê doh bi avêtina çend moşekan piştgiriya xwe a ji bo Hamasê ragihand.
Li dijî vê yekê Îsraîlê jî hejmara zêde ji leşkerên xwe li herêma sînorê Lubnanê kom kirin.
Ji ber êrişên Îsraîlê bêtirî 250 Silîstînî li Xezayê hatin kuştin
Li aliyê din ji ber êrişên artêşa Îsraîlê, navendên fermî jî di nav de bi dehan avahî li Xezayê hilweşiyan.
Li gorî daneyên Wezareta Tendirûstiyê ya li Xezayê,
232 Filîstî jiyana xwe ji dest dan.
1700 jî birîndar bûne.
Amerîka û Yekîtiya Ewrûpa piştgiriyê didin Îsraîlê
Di vê navberê de peyamên zelal ên piştgiriya ji bo Îsraîlê ji aliyê Amerîka û Ewrûpayê ve dewam dikin.
Serokê Amerîkayê Joe Biden ragihand ku ew ê desteka wan ji bo Îsraîl pir bi hêz be.
Di rewşeke wiha de Konseya Ewlekariyê ya Neteweyên Yekbûyî eşkere kir ku ew ê îro bi mijara Îsraîl û Filîstinê civîneke awarte pêk bîne.
