Dadgeha Bilind a Coloradoyê biryar da ku Serokê berê yê Amerîkayê Donald Trump nikare beşdarî hilbijartinên pêşîn yên sala bê bibe û ji ber rola wî ya di serdegirtina Kongreyê de navê wî ji dengdanê were derxistin.
Dadgehê ragihand ku ji bo îtirazkirinê dê pêkanîna biryarê heta 4’ê Çileya 2024’an taloq bikin.
Li Amerîkayê, Dadgeha Bilind a Coloradoyê biryar da ku Serokê berê yê Amerîkayê Donald Trump nikare beşdarî hilbijartinên pêşîn yên vê eyaletê ji bo pêşbirka serokatiyê ya sala bê bibe.
Dadgehê di biryara xwe ya roja Sêşemê de rola Donald Trump di serdegirtina Kongreyê ya 6’ê Çileya 2021’ê de bi bîr xist û xala 14’ê ya Destûra Bingehîn wekî sedem nîşan da.
Di xala 14. a Destûra Bingehîn de jî tê gotin ku ew rayedarên ku di nav “îsyan an jî serhildanê” de ne, nikarin bibin xwedî erkên dewletê.
Hilbijartina sala bê Trump nikare li Coloradoyê bibe namzed
Biryar bi 4 dengan li hember 3 dengan hat girtin.
Lê belê dadger di îfadeya xwe de diyar kirin ku ev biryar ji bo wan “ne hêsan e”.
Dadgehê ragihand ku ji bo îtirazkirinê dê pêkanîna biryarê heta 4’ê Çileya 2024’an taloq bikin.
Biryara mijara gotinê dibe ku li Dadgeha Bilind a Dewletên Yekbûyî were îtiraz kirin.
Dadgeha Bilind a ku biryara dawî lê bê dayîn, bi giranî ji dadgerên muhafazakar pêk tê.
Dijberên Trump jî ev demeke dirêj e dibêjin ku ji ber serdegirtina 6’ê Çileyê Serokê berê nikare careke din bibe namzed.
Li ser biryarê bertekên ekîba Trump
Berdevkê ekîba kampanyaya hilbijartinê ya Trump biryara dadgehê wek “pir nedemokratîk” bi nav kir û diyar kir ku ew ê li dijî biryarê serî li Dadgeha Bilind bidin.
Berdevkê ekîbê got: “Em di wê baweriyê de ne ku Dadgeha Bilind dê zû biryarê bide û dawî li van dozên dij-Amerîkî bîne,”
Biryara dadgeha Koloradoyê tenê vê eyaletê digire ser xwe, lê li gorî xala 14’an a Destûra Bingehîn astengkirina namzetiya Trump li eyaletên din jî di rojevê de ye.
Serokê berê yê Amerîkayê Donald Trump di nav namzedên Komarî de wek bijare tê nîşandan û li gor anketên raya giştî gelek li pêş dijberên xwe ye.
Komarparêz ji bo diyarkirina namzetê li eyaleta Lowa di 15’ê Çileyê de dê dest bi hilbijartinên pêşîn bikin.
Li Koloradoyê tê plankirin ku hilbijartinên seretayî di 5’ê Adarê de bên kirin.
