Nameyên girtiyên bi navê Ronahî Sirdaş û Gulistan Yilmaz ên ji bo Abdullah Ocalan û Omer Hayrî Konar ên li Girtîgeha Îmraliyê tên girtin, bi hincetan nehatin şandin.Li aliyekî din Parêzer Necla Mizgîn Argiş teqez kir ku çalakiya girtiyên siyasî weke parçeyek ji têkoşîna xwegihandina heqîqetê ye.
Nameyên girtiyên bi navê Ronahî Sirdaş û Gulistan Yilmaz ên li Girtîgeha Jinan a Kayseriyê ku ji Rêber Abdullah Ocalan û girtiyên li Îmraliyê re nivîsandin û şandin,hat talûkekirin.
Lijneya disiplînê bi hinceta ku di nameyê de gotinên “dilsoziya ji bo Abdullah Ocalan hene” û “ji rêxistinê veneqetiyaye” û cînavka “em”ê neşandin.
Beşa nameya Ronahî Sirdaş û Gulistan Yilmaz ên ya wekî “talûke” hat hesibandin wiha ye:
Hevrêyê min ê hêja, ji zû de ye me tu agahî ji we negirtiye.
Ji ber vê em bi her awayî ketine tatêla tenduristiya we û rewşa we.
Em li benda agahiyekê ji we ne.
Em ji 27’ê Mijdarê ve bi awayekî piratîkî di çalakiyê de ne.
Nebûna derfetan kiriye ku em li ber xwe bidin.
Wekî hûn jî her tim dibêjin, em di van şertan de pir nikarin afirîner bibin.
Lewma em mehcûbiyeta wê ji kûr ve hîs dikin.
Ronahî Sirdaş li dijî biryara lijneya disiplînê serî li 1’emîn Dadgeriya Înfazê ya Kayseriyê da.
Dadgeriyê ji bo ji nû ve nirxandinê biryar da ku ji heman saziya înfazê re bê şandin.
Her wiha nameya Gulistan Yilmaz a ji Omer Hayrî Konar re şand jî bi heman hincetê nehat şandin.
“Çalakiya girtiyên siyasî parçeyek ji têkoşîna xwegihandina heqîqetê ye”
Li aliyekî din Rêvebera Komeleya Hiqûqnasan a ji bo Azadiyê ya Stenbolê parêzer Necla Mizgîn Argiş li ser çalakiya girtiyên siyasî ên li dijî tecrîdê axivî.
Necla Mizgîn Argiş diyar kir ku bi taybetî li ser civaka Kurd, berxwedêran tecrîdeke giran heye û got,
“Vê polîtîkayê li Girava Îmraliyê destpê kir.
girtiyên siyasî vê çalakiyê ne tenê weke helwesteke nerazîbûnê dikin, weke parçeyek ji têkoşîna xwegihandina heqîqetê dibînin.
Girtî destnîşan dikin ku hemû beşên civakê divê li pêşberî vê têkoşînê bêdeng nemînin, kiryara tecrîdê qebûl nekin.”
Necla Herî dawî bang li Wezareta Edaletê kir ku çareseriyên bi bandor, mayinde û mirovî peyda bike ji bo pêşî li binpêkirina mafên mirovan bê girtin.
