Gerîlayên YJA Starê bi armanca silavkirina Roja Fedaîtiyê ya 30’yê Hezîranê, li Xakurkê li dijî leşkerên Tirk ên dagirker çalakî lidarxistin.
Di encama çalakiya gerîlayên YJA Starê de 5 leşkerên Tirk hatin cezakirin.
HPG’ê ragihand ku qadên wan dîsan bi çekên qedexekirî hatine bombebarankirin.
Gerîlayên HPG’ê û YJA Starê careke din derbeke giran li dagirkeran dan û 5 dagirker ceza kirin.
HPG’ê got, ev çalakî bi armanca silavkirina Roja Fedaîtiyê ya 30’yê Hezîranê hatiye lidaxistin.
Navenda Ragihandin û Çapemeniyê ya HPG’ê têkildarî çalakiyên gerîla û êrişên artêşa Tirk a dagirker daxuyaniyek da.
Di daxuyaniyê de ev agahî hate parvekirin:
“Li herêma Xakurkê 22’ê Hezîranê ji aliyê artêşa Tirk a dagirker ve li qada Şehîd Qehreman operasyonek hate destpêkirin.
Hêzên me dagirker xistin bin kontrolê û bi rêbaza sabotajê lê dan.
Di çalakiyê de 4 dagirker hatin cezakirin û 3 jî birîndar bûn.
Dagirkeran li vê derê bombeyên mijê bi kar anîn, piştre jî mirî û birîndarên xwe ji qadê birin.
Piştî wê careke din çalakiya sabotajê hate kirin û di encamê de dagirkerek hate cezakirin.”
HPG’ê diyar kir ku ev çalakî ji aliyê hêzên YJA Starê ve bi armanca silavkirina Roja Fedaîtiyê ya 30’ê Hezîranê hate lidarxistin.
Li gorî daxuyaniyê gerîlayan di 23’ê û 24’ê Hezîranê de jî li herêma Metîna û Rojavayê Zapê gelek caran li dagirkeran dane.
Di encama van çalakiyan de liv û tevgera dagirkeran hate rawestandin.
Her wiha droneyeke bombebarkirî û konteynirek dagirkeran hate bêkêrkirin.
Qadên gerîla 6 caran bi çekên qedexekirî hat bombebaran kirin
Di dewama daxuyaniyê de HPG’ê têkîldarî êrişên artêşa Tirk a dagirker ev agahî parve kir:
“24’ê Hezîranê li herêma Şehîd Delîl a Rojavayê Zapê tunelên me yên li Qada Berxwedanê ya Girê FM û Girê Cûdî 6 caran bi teqemeniyên qedexekirî hatin bombekirin.
23 û 24’ê Hezîranê jî herêma Metînayê û Rojavayê Zapê 6 caran bi balafirên şer hatin bombekirin.”
