Kremlînê bal kişand ser wê yekê ku tetbîqata rêgirtina nukleerî ya ku NATO roja Duşemê dest pê kir xeternak e.
Berdevkê Kremlînê Dmitriy Peskov diyar kir ku Amerîka, Îngilîstan û Fransa “rasterast an nerasterast” tevlî şer bûne.
Li aliyê din Rûsya jî ku di van 2 sal û nîvan de tetbîqatên xwe yên nukleerî pêk anî, gefa bikaranîna çekên nukleerî jî xwar, eger xetên sor bên derbaskirin.
Kremlîn tetbîqata leşkerî ya NATO’yê ya li ser astengkirina nukleerî ku roja Duşemê dest pê kiribû rexne kir.
Berdevkê Kremlînê Dmitriy Peskov roja Duşemê di daxuyaniyekê de ji ajansa nûçeyan a Rûsî Interfax re ragihand ku NATO bi tetbîqata mijara gotinê re, ji ber şerê li Ukraynayê aloziya di navbera Rûsya û Rojava de zêde kiriye.
Peskov got:
“Di çarçoveya şerê germ de ku ji ber şerê Ukraynayê tê meşandin, tetbîqatên bi vî rengî ji zêdekirina rageşiyê pê ve tiştek din nayne.”
Tetbîqata du hefteyî ya ku NATO’yê salê carekê li dar dixe, bi navê “Steadfast Noon” tê kirin.
Peskov: DYA, Îngîlîstan û Fransa rasterast an nerasterast tevlî şer bûne
Her wiha Peskov bi peyama ku Rûsya ji bo danûstandinên kêmkirina hejmara çekên nukleerî yên li cîhanê amade ye, anî ziman ku di şert û mercên ku hêzên nukleer ên wekî Amerîka, Îngilîstan û Fransa piştgiriya çekên konvansiyonel bidin Ûkraynayê, ev yek ne mimkûn e.
Dîmîtrî Peskov diyar kir ku welatên mijara gotinê “rasterast an nerasterast” tevlî şer bûne û wiha got:
“Rûsya pêwendiyeke wiha pêwîst dibîne û divê neyê paşxistin.
Lê belê divê em hemû mijarên ewlehiyê bi giştî binirxînin û rewşa niha li ber çavan bigirin.”
Serokê Amerîkayê Joe Biden di daxuyaniya xwe ya roja Îniyê de peyam da ku ew ji bo hevdîtinên bi Rûsya, Çîn û Koreya Bakur re amade ne.
Rûsyayê doktrîna xwe ya nû ragihand
Li aliyê din Rûsya jî ku di van 2 sal û nîvan de tetbîqatên xwe yên nukleerî pêk anî, gefa bikaranîna çekên nukleerî jî xwar, eger xetên sor bên derbaskirin.
Serokdewletê Rûsyayê Vladîmîr Pûtîn herî dawî fermana guhertina doktrîna nukleerî da û got:
“Êrîşa li dijî Rûsyayê ji aliyê welatekî ne nukleer, bi beşdarbûn yan jî piştgiriya hêzeke nukleerî, wê weke êrîşeke hevpar a li dijî Federasyona Rûsyayê bê qebûlkirin.”
Pûtîn destnîşan kir ku doktrîna nû ya çekên nukleerî tê wê wateyê ku ew mafê bikaranîna çekên nukleerî di dema êrîşkirina li dijî Rûsya û Belarûsê de diparêzin.
