Ji ber ambargoyê nexweşên penceşêrê nikarên dermanên xwe peyda bikin ji ber vê yekê gelek zehmetiyan dikişînin.
Rewşa 2 nexweşên pençeşêrê ku niha li Qamişloyê têne dermankirin, vê yekê nîşan dide.
Heyva Sor a Kurd li gorî derfetên xwe ji wan nexweşan re dibe derman.
Rêvebera Heyva Sor banga li rêxistinên mirovî kir ku alîkariyên tenduristî ji şêniyên herêmê re pêşkêş bikin.
Hêjî ambargoya li ser herêmên bakur û rojhilatê Sûriyê bi şêweyên cuda dewam dike.
Ji ber vê ambargoyê nexweşên hinek nexweşiyan nikarên demanên xwe peyda bikin.
Nexweşên pençeşêrê ji ber tunebûna hin cureyên dermanan ku buhayên wan di navbera 500 û 800 dolarên amerîkî de ne, li Bakur û Rojhilatê Sûriyê pir zehmetiyan dikişînin.
Nexweşên Penceşêrê ji ber tunebûna dermanên xwe zehmetiyan dikişînin
Zaroka bi navê Dîlan Îbrahîm ku dayîka wê, wê li nexweşxaneya Heyva Sor a kurd derman dike, bi laşê xwe yê nazik, li dijî nexweşiya pençeşêra xwînê ku nîşaneyên wê nêzî 5 meh in dest pê kirine, têkoşîneke dijwar dike.
Ew bi dayika xwe re her hefte serdana Nexweşxaneya Onkolojî, Talasemî û Şewitandinê ya li Qamişloyê dike, berê jî li Şamê dihate dermankirin.
Nisrîn Mihemd, dayika Dîlanê ye. Nisrîn dibêje:
“Derman li wir peyda dibin, lê lêçûna me zêde ye, em nikarin kirêya oda otêlê bidin, em neçar in ku her hefte li parkê bisekinin heta ku dora me ya nexweşxaneyê bê.”
Heyva Sor a Kurd li gorî derfetên xwe ji nexweşên Penceşêrê re dibe bersiv
Nexweş Hemîd Hisên derbarê nexweşiya xwe de dibêje: “Derman li vir hene. Carê her ku diçûm Şamê ji aliyê aborî ve min zehmetî dikişand, li vir tu xerca derman û xizmetguzariyê nadim û hemû derman û derzî bê pere ne.
Di wê derbarê de Rêvebera nexweşxaneya Heyva Sor a kurd Hediya Ebdullah axivî.
Hediya Ebdullah got ku ew ji ber lêçûnên giran ên dermanan di warê dermankirina nexweşên pençeşêrê de rastî gelek zehmetiyan tên.
