Navenda Ragihandinê ya Gaziyên Bakur û Rojhilatê Sûriyê qetilkirina rojnamevan Azîz Koyluoglû yê di êrîşa dewleta Tirk de şehîd bû, şermezar kir û got,” Em ê ti carî ji rêya ku mamosteyê me heval Azîz nîşanî me da venegerin.”
Navenda Ragihandinê ya Federasyona Gaziyên Bakur û Rojhilatê Sûriyeyê têkildarî qetilkirina rojnamevan Azîz Koyluoglû yê di êrişa dewleta Tirk a li Ranyayê de şehîd bû, daxuyaniyeke nivîskî weşand.
Daxuyanî bi vî rengî ye:
“Bi xemgîniyeke mezin me zanî ku hevalê me yê ragihandina azad, şoreşgerê heqîqetê hevrê Azîz Koyluoglû 27’ê Çileyê li Ranya ya girêdayî Başûrê Kurdistanê, di encama êrîşeke dewleta Tirk a dagirker de şehîd bûye.
Em vê êrîşa nemerd û bêbext a li hember şopdarê heqîqetê hevrê Azîz Koyluoglû bi tundî şermezar dikin.
Hevrê Azîz bi salan ji bo êş û azarên gelê Kurd bigihîne hemû cîhanê têkoşîn kir.
Bi jiyan, kesayet û sekna xwe divê şoreşgerek û rojnamevanek heqîqetê çawa be, nîşanî me hemû hevalên xwe yên ragihandina azad kir.
Ji Şengala pîroz, heya Rojava warê berxwedanê û Başûrê Kurdistanê li gelek qadan bû dengê mirovatiyê.
Bi tehlîl, analîz û nivîsên xwe gelên herêmê li hember rastiya dagirkeriya dewleta Tirk a dijminê pêkve jiyana gelan e hişyar kir.
Paradîgma û felsefeya Rêbertî ji hemû pirsgirêkên civakî re bê çareseriyeke çi qasî mayînde ye bi pênûsa xwe îzah kir.
Weke şagirtên hevrê Azîz û Ragihandina Gaziyên Şer ên Bakur û Rojhilatê Sûriyeyê em pir bi hêrs û xemgîn in.
Lê belê em soz didin ku pênûs û ala heval û mamosteyê xwe Azîz li erdê nehêlin.
Ji ber em dizanin ku tenê bi mezinkirina têkoşîn û berxwedanê em ê karibin bibin layiqî şehîdên xwe û armanca wan pêk bînin.
Di serî de ji malbata heval Azîz, em ji tevahî gelên herêmê re sersaxiyê dixwazin. Em ê ti carî ji rêya ku mamosteyê me heval Azîz nîşanî me da venegerin.”
