”Modela Rojava ji bo paşeroja Sûriyê mînakeke bêhempa ye” bi van gotinan Hevseroka Tevgera Dostaniya Navbera Gelan û Têkoşîna li dijî Nijadperestiyê Renee Le Mignot bal kişand li ser girîngiya pêvajoyê û got:
”Paşeroja Sûriyê divê radestî dîktatoriya Îslamî ya radîkal neyê kirin, modela Rojava ji bo paşeroja Sûriye û Rojhilata Navîn mînakeke bêhempa ye.”
Hilweşîna rejîma Bass hevsengiyên leşkerî û siyasî yên li Sûriyê bi rengekî radîkal guhertibe jî paşeroja vî welatî hîn nediyar e.
HTŞ’ê û rêveberê wê Colanî valahiya desthilatdariyê bi lez girtin.
Lê belê ev rewşa xweşbîn di demeke kurt de veguherî fikaran.
Kuştin û komkujiya li dijî Elewiyan a li herêmên Perava Sûriyê hem li nava raya giştî hem jî li nava derdorên navneteweyî bû sedema nerazîbûnên mezin.
Li aliyê din, dewleta Tirk ku piştevanê herî mezin ê HTŞ’ê ye û komên wê yên çete êrîşên xwe yên li ser herêmên Bakur û Rojhilatê Sûriyê û dagirkeriya xwe ya li herêmê dewam dikin.
Pratîkên siyasî yên Colanî ku xwedî meylên otorîter e û feraseta wî ya rêveberiyê ya dûrî pirrengiyê, li nava civaka navneteweyî bû sedema rûdana pirsên cidî yên li ser veguherîneke rasteqîn a li Sûriyê.
Renee Le Mignot: Li Rojava şer û sûcên li dijî mirovahiyê têne kirin
Hevseroka Tevgera Dostaniya Navbera Gelan û Têkoşîna li dijî Nijadperestiyê (MRAP) a navenda wê li Fransayê ye Renee Le Mignot êrîşên li ser Rojava û girîngiya modela Rojava ji bo paşeroja Sûriyê nirxand.
Renee Le Mignot destnîşan kir ku dewleta Tirk ji destpêka şerê navxweyî yê Sûriyê û vir ve li hemberî Rojava polîtîkayeke dijminane meşand û got:
Êrîşên dewleta Tirk ên li ser herêmê hem sûcê şer e hem jî sûcê li dijî mirovahiyê ye.
Weke ku li Dadgeha Gelan a Rojava bi belgeyan hate destnîşan kir, dewleta Tirk li Rojava yekser êrîşê dibe ser sivîlan.
Windakirin, koçberkirina bi zorê, ev hemû dikevin ber sûcên şer.
Tinekirina çand û civakekê bi zanebûn sûcekî li dijî mirovahiyê ye.
Renee Le Mignot: Ji bo PKK ji lîsteya terorê bê derxistin em têdikoşin
Renee Le Mignot helwesta Ewropayê ya li hemberî dewleta Tirk rexne kir û wiha bi lêv kir:
Dadgeha Ewropa bi şênberî nîşan dide ku PKK hurmetê nîşanî Peymanên Cenevreyê dide.
Ya ku li Rojava û aliyên din ên Kurdistanê li gorî vê peymanê tevnagere dewleta Tirk bi xwe ye.
Dema ku ev li ber çavan bê girtin, weke tevger em ji Fransayê dixwazin ku PKK’ê ji lîsteya ‘terorê’ derxîne.
Renee Le Mignot: Modela Rojava ji bo paşeroja Sûriyê mînakeke bêhempa ye
Renee diyar kir ku Tirkiye dixwaze sîstema Rojava tine bike ku ji bo demokrasiya Rojhilata Navîn modeleke bêhempa ye û got:
Modela Rojava ji bo demokrasiyê, jiyana bi hev re, mafên hindikahiyan -çi çandî çi jî civakî- mînakeke cihê hurmetê ye.
Modela Rojava ji bo tevahiya pirsgirêkên li Sûriyê dikare bibe çareserî.
Lê belê eger modela Rojava esas bê wergirtin, Sûriyeke demokratîk ava bibe, sîstemeke ku mafên Kurdan û pêkhateyên din nas dike ava bibe, ev yek ji bo Sûriyê dikare bibe hêvî.
