Li Îranê di van çend rojan de pêla girtina jinan careke din zêdetir bûye.
3 jinên din bi hincetên cuda hatine girtin û cezayên giran li wan hatiye birîn.
Li dijî zext û cezayên darvekirinê jî girtiya siyasî Hura Nîkbext a li Girtîgeha Evînê a Îranê tê ragirtin, dest bi greva birçîbûnê kir û got dê çalakiya xwe heta rakirina van cezayan bidomîne.
Binçavkirin, girtin û darvekirina jinan li Îranê her diçe zêdetir dibe.
Jinên ku li dijî van kirinan jî derdikevin têne girtin û cezyên girna li wan têne birîn.
Rêxistina Mafên Mirov a HRNA’yê ragihand ku xwendekara zanîngehê Hestî Emîrî ji ber li dijî cezayê darvekirinê yê Pexşan Ezîzî û binpêkirinên rejîmê helwest nîşandaye, hatiye girtin.
Hestî Emîrî 26’ê Nîsanê li zanîngeha Elame Tebatebayî ya Tehranê hat binçavkirin.
Her wiha hat diyarkirin ku destpêkê Şaxa 1’emîn a Dozgeriya Giştî ya Girtîgeha Evîn ji bo îfadeyê gazî Hestî Emîrî kiriye û piştre li wir hatiye binçavkirin û şandine girtîgeha Evînê.
Beriya niha di 6’ê Adara 2025’an de hêzên Îtlaeta Îranê bi ser mala Hestî Emîrî de girtibûn, li mala wê lêgerîn kiribûn û dest danîbûn ser telefon û kelûpelên wê yên taybet.
Di Tebaxa 2023’yan de Hestî Emîrî bi îdîaya ‘propaganda li dijî dewletê’ cezayê salek girtîgehê lê hatibû birîn.
Di 5’ê Tebaxa 2024’an de ji girtîgehê hatibû berdan.
Desthilata Îranê 16 sal cezayê girtîgehê li jina bi navê Nêrgiz Nasirî birî
Her wiha li paytexta Îran Tehranê, 16 sal cezayê girtîgehê û 15 sal cezayê bêparmayina ji mafên civakî li jineke bi navê Nêrgiz Nasirî hate birîn.
Hate diyarkirin ku Nêrgiz Nasirî ya Mesihî û nişteciha Tehranê, bi tometên ‘çalakiyên propagandayê yên li dijî Şerîeta û ‘propagandaya li dijî dewletê’ hate mehkûmkirin.
Desthilata Îranê jina bi navê Jîla Mehtab girt
Jina bi navê Jîla Mehtab jî 26’ê mehê li Tehranê hat girtin.
Malpera Dengê Binçavkiriyên Kurd û Îranê, ragihand ku Jîla ji aliyê Dadgeha Şoreşê ve bi sûcê ‘Propagandaya dijî dewletê, tehşîrkirina rêberên mezin’ cezayê yek salê yê girtinê lê hatiye sepandin.
Girtiya siyasî Hura Nîkbext li dijî cezayên darvekirinê dest bi greva birçîbûnê kir
Li dijî zext û cezayên darvekirinê girtiya siyasî Hura Nîkbext a li Girtîgeha Evînê a Îranê tê ragirtin, dest bi greva birçîbûnê kir.
Hura Nîkbext li dijî zêdebûna cezayê darvekirinê ji girtîgehê peyamek belav kir.
Hura Nîkbext ragihand ku li dijî bêdengiya welatiyan a li hemberî zêdebûna derxistin, erêkirin û pêkanîna cezayên darvekirinê dest bi greva birçîbûnê kiriye.
Her wiha tekez kir ku heta ku helwesteke cidî li dijî cezayên darvekirinê neyê girtin, dê dev ji çalakiya xwe bernede.
