Wezîrê Karên Derve yê Fransayê Jean-Noel Barrot ragihand ku ew di navbera QSD û Tirkiyê de navbeynkariyê dikin û piştgiriya Fransayê ya ji bo Kurdan dubare kir.
Her wiha Barrot got divê hemû mafên Kurdan bêne naskirin.
Wezîrê Karên Derve yê Fransayê Jean-Noel Barrot bersiv da nameya Senator Pascal Savodelli.
Di nameyê de hatibû gotin ku divê Fransa Rêveberiya Xweser a Bakur û Rojhilatê Sûriyê bi tenê nehêle.
Barrot anî ziman ku Fransa Kurdên Sûriyê diparêze û hewldanên xwe yên dîplomatîk ên ji bo aramiya li herêmê dewam dike.
Nameya Wezîr Barrot a ji bo Senator Savodelli bi vî rengî ye:
“Fransa rewşa Kurdên li Sûriyê -hevalbendên me yên dîrokî yên têkoşîna li dijî terorîzmê- bi baldariyeke taybet dişopîne.
Zexta Beşar Esad a li ser gel, ku ji sala 2011’an û pê ve dewam kir, yekser bû sedem ku gefa terora DAÎŞ’ê zêde bibe.
Li hemberî vê gefê, weke Fransa me di çarçoveya koalîsyona navneteweyî ya li dijî DAÎŞ’ê de li gel Hêzên Sûriya Demokratîk têkoşîn meşand.
Di 8’ê Kanûna 2024’an de bi ketina rejîma Esad re li Sûriyê hêviyeke mezin afirî.
Li Sûriya nû divê Kurd bi rengekî tam û welatiyên wekhev beşdarî jinûve avakirina civaka Sûriyê bibin,
Divê hemû mafên Kurdan werin naskirin.”
“Pêvajoya derbasbûnê ya li Sûriyeyê divê her kesî vehewîne”
Di nameyê de hat diyarkirin ku pêvajoya derbasbûnê ya li Sûriyê divê her kesî vehewîne û got:
“Ev nêzîkatî ji aliyê Serokkomarê me ve di 7’ê Gulanê de li Parîsê di hevdîtina bi serokê demkî yê Sûriyê Ehmed El Şari de careke din hate piştrastkirin.
Ev pêvajoya derbasbûnê ya siyasî divê hemû pêkhateyên civaka Sûriyê li hev kom bike.
Peymana ku 10’ê Adarê di navbera Otorîteya Sûriyê û Hêzên Sûriyeya Demokratîk de hate mohrkirin, gava destpêkê ya erênî ye û bi demê re divê jinûve yekbûna Sûriyê û entegrasyona Kurdan bê pêkanîn.
Weke Fransa ji bo navbeynkarî û piştgiriya bi diyalogê re me tevkarî li vê pêvajoyê kir û ji bo ev peyman bi temamî bê bicihanîn em piştgiriya xwe ya ji bo danûstandinan dewam dikin.
“Bi rêk û pêk hevdîtinê bi Mazlûm Ebdî re dikim”
Di nameyê de Barrot destnîşan kir ku di 24’ê Nîsanê li Hewlêrê de wî hevdîtin bi Fermandarê Giştî yê QSD’ê Mazlûm Ebdî re kir û wiha domand:
“Pê re timî di nava danûstandinan de me.
Di hevdîtinê de me rê û rêbazên misogerkirina ewlekariya nifûsa Kurd a li Bakur û Rojhilatê Sûriyeyê nirxand.
Her wiha em hewl didin entegrasyona Kurdên Sûrî bi derdorên herêmî re misoger bikin.”
“Me di navbera Tirkan û Kurdan de karê navbeynkariyê kir”
Di dawiya nameyê de wiha hat gotin:
“Di navbera Kurdên li Bakur û Rojhilatê Sûriyê û rayedarên Tirk de me karekî navbeynkariyê kir.
Di danûstandinên xwe yên bi rêk û pêk de em bang li rayedarên Tirk dikin ku kêmkirina rageşiyê teşwîq bikin, dawî li rewşa şer bînin,
em bang li hemû aliyan dikin ku li gorî modûseke guncaw a vivendi (rêyeke lihevkirinê) peyda bikin.
Her wiha ji bo hevdîtinên navbera Kurdên Sûrî û Kurdên li Iraqê hêsan bikin, em xebitîn.”
