Parlementerê DEM Partî Omer Ocalan derbarê hevdîtina xwe ya ku 7’ê Hezîranê bi Rêber Apo re pêk anîn axivî.
Omer Ocalan diyar kir Rêber Apo xwestiye li her derê bi gel re niqaş bên kirin û civîn û konferans bên lidarxistin.
Her wiha ji bo Şengalê jî gotiye, “Divê Şengalek azad hebe û xwedî statu be.”
Parlementerê DEM Partî û biraziyê Rêber Apo Omer Ocalan 7’ê Hezîranê bi boneya cejna qurbanê çûn Îmraliyê û hevdîtin pêk anîn.
Omer Ocalan têkildarî hevdîtinê ji Ajansa Mezopotamyayê (MA) re axivî.
Omer Ocalan diyar ku wan hevdîtineke demdirêj pêk aniye û gelek mijarên cuda hatine nîqaşkirin.
Omer Ocalan diyar kir Rêber Apo destpêkê pirsa malbatê û gund kir û silavên xwe ji malbatên kadroyên pêşeng yên Tevgera Azadiyê Mazlûm Dogan, Ferhad Kûrtay, Eşref Anyik, Mehmûd Zengîn, Necmî Oner, Elî Çîçek re şand.
Rêber Apo: Eger DEM Partî ji sedî 20 deng bigire wê bibe desthilat
Omer Ocalan diyar kir wan li ser rewşa DEM Partî niqaş kiriye û Rêber Ocalan diyar kiriye ji DEM Partiyê re rêya siyaseta demokratîk vedibe û ev nirxandin kiriye:
“Divê DEM Partî li her derê konferans û civînan li dar bixe. Divê bi gel re gotûbêj werin kirin.
Ji bo ku DEM Partî siyaseteke berfireh bike gelek derfet derketine holê. DEM Partî eger ji sedî 20 dengan bi dest bixin, wê bibe desthilatdar.
Bi siyaseteke demokratîk wê dengên DEM Partiyê ji sedî 20 derbas bike. Wê demê dikare li Rojhilata Navîn siyaseteke bi bandortir bimeşîne.”
Rêber Apo: Divê em buyeran û encamên wan bi wêrekî şîrove bikin
Omer Ocalan da zanîn wî li ser rapora ku ji bo Kongreya 12’emîn a PKK’ê re şandiye pirsek pirsiye û diyar kiriye ku rexne û hin hesasiyetê Elewiyan hene û Rêber Apo wiha bersiv daye:
“Em li vir jî ji bo Elewîtiyê dixebitin. Em Elewîtîyek rast dişopînin. Li vir hevalên me yên Elewî jî hene. Hamili Yildirim ji Dersimê ye û Elewîtiyê baş dizane. Min qîmet da Seyîd Riza, helwest û têkoşîna wî.
Di dîrokê de gelek serhildanên Kurdan çêbûne; ez qîmetê didim têkoşîn û hewldanên wan.
Divê em bûyeran û encamên wan bi wêrekî şîrove bikin. Ev ji bo Şêx Seîd jî derbasdar e. Em ji bo rexneyên çeker vekirî ne.”
Rêber Apo: Divê Şengal bibe xwedî statu û bi kesî ve girêdayî nebe
Omer Ocalan diyar kir wan li ser Êzidyan jî niqaş kirine û Rêber Apo silavên xwe ji civaka Êzidî re şandiye û gotiye,
“Divê Şengaleke azad hebe, divê Şengal ne bi hikûmeta navendî û ne jî bi partiyeke herêmî ve girêdayî be.
Divê Şengal bibe xwedî statû, divê Êzidî xwe birêxistin bikin û biryaran ji bo xwe bidin.”
