Ji vê sibehê ve hêzên hikumeta veguhêz a Sûriyê taxên Siwêdayê topbaran dike û qedexeya derketina derve li bajêr ragihand.
Ji ber şer û aloziyê şêniyên Siwêdayê ji bajêr direvin û koçber dibin.
Serokatiya ruhanî ya muslimanên miwehidîn (durzi) jî ragihandin ku ji bo rewestandina êrişan û belavkirina aramiyê wan destûr dan hêzên hikumeta veguhêz a Sûriyê derbasî nava Siwêdayê bibin.
Ji 13’ê Tîrmehê hata niha ji ber şer 99 kes li Siwêdayê hatin kuştin.
13’ê Tîrmehê çekdarên êlên bedewî yên girêdayî hikumeta veguhêz a Sûriyê li Siwêdayê êrişî Durziyan kirin.
Ji wê demê ve şer û aloziya li Siwêdayê dewam dike.
Ji serê sibê ve, hêzên hikumeta veguhêz a Sûriyê bi berdewamî taxên Siwêdayê topbaran dikin.
Di heman demê de, hikumeta veguhêz a Sûriyê qedexeya derketina derve li bajêr ragihandin, ku ji saet 8:00 sibê ve destpêkir heta demeke ne diyar.
Her wiha bang li şêniyan kirin ku li malên xwe bimînin.
Şêniyên Siwêdayê ji bajêr direvin û koçber dibin
Nûçegehanê me ji Siwêdayê raghand ku ji seatên sibehê ve, bajar şahidê koçberiyeke mezin a şêniyan ber bi gundewarên derdorê ve kir.
Ev yek jî di nav dengê çekan û pevçûnên tund de pêk hat.
Ev koçberî ji ber rewşa ewlehiyê ya aloztir tê, ku malbat li deverên ewletir ên dûrî navenda bajêr digerin.
Di pevçûnan de sivîlek dema ku bi malbata xwe re direviya, bi guleyan hat kuştin.
Serokatiya Ruhanî ya Durziyan: Me destûr da ku hêzên hikumeta veguhêz derbasî Siwêdayê bibe
Serokatiya ruhanî ya muslimanên miwehidîn (durzi) ragihandin ku ewê destûrê bidin hêzên hikumeta veguhêz a Sûriyê derbasî nava Siwêdayê bibin û bang li komên Durzî kirin ku çekên xwe radest bikin.
Serokatiyê di daxuyaniyê de diyar kir ku divê çareserî aştiyane û dîplomatîk be û ew di wê baweriyê de ye ku hikumeta veguhêz xwedî heman helwest be û got:
Ji bo rawestandina kiryarên dijî mirovahiyê, rijandina xuyînê û belavkirina aramiyê, me rê da ku hêzên hikumeta vehuhêz a Sûriyê derbasî Siwêdayê bibe.
Têkilyên me bi hikumetê re qut nebûne û qut nabin û em bi çareseriyê bawer in ku bi erêkirina her kesî be.
Wezareta Karên Hundir a Sûriyê 15’ê Tîrmehê roja Sêşemê daxuyaniyek da û diyar kir ku wê bikevin nava bajarê Durziyan Siwêdayê û qedexeya derketina derve ragihand.
Di encama şerê li Siwêdayê 99 kes hatin kuştin
Li gorî Saziya Çavdêriya Mafên Mirovan a Sûriyeyê (SOHR) di şer de 99 kes hatin kuştin ku 60 ji wan Durzî, 18 ji wan Bedewî, 14 jê endamên hikumeta veguhêz a Sûriyê û 7 çekdar jî nasnameya wan nediyar bû.
Hewldana kuştina Şêxê Durziyan Hikmet El-Hicrî têk çû
Li aliyekî din, rêberê ruhanî yê civaka muslimanên mihwehidîn (durzi) ya Sûriyeyê şêx Hikmet El Hicrî ji hewldaneke kuştinê fitiye.
