Rûsyayê şevê din êrişa herî mezin ya ezmanî li dijî Ûkraynayê pêk anî.
Hat diyarkirin artêşa Rûsyayê bi zêdeyî 800 balafirên bê mirov û 13 fuzeyan êrişî gelek deverên li Ûkraynayê kir.
Hat ragihandin di êrişan de avahiya hikumetê ya li paytext Kîevê jî hatiye bombebarankirin.
Şerê Rûsya û Ûkraynayê roj bi roj rê li ber mirinên zêde û malwêraniyê vedike.
Şevê din Artêşa Rûsyayê pêleke êrişên nû li dijî Ûkraynayê pêk anîn.
Hat ragihandin Rûsyayê bi zêdeyî 800 balafirên bê mirov û 13 fuzeyan li dijî Ûkraynayê êrişên ezmanî pêk anîn.
Avahiya hikumetê ya li kîevê jî bû hedefa êrşan
Hat diyarkirin ji destpêka şer de, ev êrişa herî mezin ya ezmanî ye.
Hêzên Ezmanî yên Ûkraynayê jî ragihandin ku wan 747 balafir û 4 jî fuze bê bandorkirine, balafir û fuzeyên mayî jî li seranserî welat li 37 deveran ketine.
Di encama êrişan de li paytext Kîevê yek jê zarok herî kêm 2 kesan, li hin herêmên Sumy û Dnipro jî 2 kesan jiyana xwe ji dest dane.
Her wekî hate ragihandin ku avahiya hikumetê ya li Kîevê jî buye hedefa êrişan, Rûsyayê heta niha avahiyên hikumetê yên li Kîevê nedikir armanc.
Serokwezîrê Ûkraynayê Yuliya Sviridenko derbarê êrişê de got, “Cara ewil avahiyeke hikumetê di êrişa dijmin de ziyan dît.”
Êriş di demeke ku li Ukraynayê hêviyên aştiyê kêm bûne, pêk hat
Di demekê de ku li Ûkraynayê hêviyên aştiyê kêm bûne, ev êrişa berfireh ya dawiyê, pêk hat.
Hevdîtina Serokê Amerîkayê Trump û Serok Dewletê Rûsyayê Pûtîn ya li Alasayê jî di navê de, hemû hevdîtinên bi armanca bi dawîkirina şer, bê encam man.
Artêşa Rûsyayê vê gavê ji sedî 20 xaka Ûkraynayê xistiye bin kontrola xwe û tê ragihandin hê jî pêşdeçûna xwe didomîne.
Zelensky daxwaza pûtîn red kir: Bila ew were kîev’ê
Li aliyê din Serok Dewletê Ûkraynayê Volodimir Zelesky daxwaza Serok Dewletê Rûsyayê Vladimir Pûtîn ya hevdîtina li Moskoyê red kir.
Zelensky ragihand ku ev daxwaza hevdîtina li Mosko ne rasteqîne û got, “Ez nikarim biçim patyeta vî terorîstî, ji ber Ûkrayna her roj di bin êriş û gulebaranê de ye. Bila Pûtîn were Kîev’ê”
