Beşa duyemîn a hevpeyvîna li gel Rêber Apo jî hat weşandin.
Ev hevpeyvîn di sala 1997’an de li bajarê Bar Elîasê yê Lubnanê bi rojnamevanekî Tirk re hatibû kirin.
Rêber Apo di hevpeyvîna wê çaxê de dibêje: “Lihevkirineke demokratîk a berfireh dikare pir mezin bide qezenckirin.”
Piştî 28 salan hevpeyvîna Rêber Apo ya li gel rojnameger Fatîh Altayli wekî du beşan hat weşandin.
Duh beşa yekem û îro jî beşa duyemîn ji hêla malpera “Özgür Düşüncelere (Fikrên Azad)” ve hate weşandin
Rêber Apo, di vê beşê de pirsên Altayli yên têkildarî siyasetmedarên demê, têkiliyên Kurd-Tirkan, çavkaniyên fînansê yên PKK’ê û hwd. dibersivîne.
Rêber Apo: Li şûna hevtasfiyekirinê divê em rêyeke lihevkirinê bibînin
Rêber Apo ji bo peywendiyên Kurd û Tirkan, destnîşan dike ku li şûna hevdu tasfiyekirinê divê rêyeke lihevkirinê bê dîtin û wiha dibêje: “Li gorî min a herî bi mentiq ev e. Lihevkirineke berfireh a demokratîk, dikare destkeftiyên mezin bi xwe re bîne.”
Rêber Apo, radestkirina 8 leşkerên dîlgirtî yên dewleta Tirk û şandeya ji Tirkiyeyê di sala 1996’an de ji bo wergirtina wan hatiye bi bîr xist û got:
“Min xwest radestkirin li pêşberî çapemeniyê be.
Ji ber ku gel xwişk û biratiyê dixwazin.
Divê rondikên dayikan bisekinin.
Min xwest ku gelê Tirkiyeyê girêdana di navbera dayik û zarokên xwe de bibîne.
Dîmena herî dilêş a salên dawî hembêzkirina di navbera dayik û leşker de ye.
Dîtina vê rastiyê pir girîng e.
Ji ber ku bi hezaran kesên mîna wî ketin bin axê.
Min xwest ku gel şahidiya vê yekê bike da êşeke wiha dubare nebe.”
Rêber Apo bi berdewamî dibêje pirsgirêka PKK’ê ne kuştina leşkeran e, ew li pey hin daxwazên pir xwezayî, mirovî û demokratîk in û
“Ma ne heyf e ku ewqas Kurd bêkar bimînin? Ma ne heyf e zimanê wan bê tinekirin û axên wan bên wêrankirin. Em dixwazin rêya çareseriyê vekin.”
Rêber Apo: Piştî ziman hat qedexekirin mejî jî azadane naxebite!
Rêber Apo li ser polîtîkayên dewleta Tirk ên ku zimanê Kurdî qedexe dike jî dipirse, “Gelo piştî zimanê mirovekî bê qedexekirin, wê mejiyê wî bi rengekî azad bixebite?” û qedexeya ziman wekî bêparmayîna ji şeref, rûmet û ji her tiştî dinirxîne.
Rêber Apo: Ji bo pirsgirêka Kurd divê gavên têrker bên avêtin û em li hev rûnin
Rêber Apo di hevpeyvîna wê salê de wekî ku roja me vedibêje wiha behsa nêrînên xwe yên têkildarî danûstendinên li gel dewleta Tirk dike:
“Heke di mijara Kurd de pêngaveke têrker were avêtin, divê em pêşiyê bi awayekî wêrek li hev rûnin. Wê di her astê de wekî leşkerî, aborî, çandî, siyasî, şande werin avakirin. Bi hezaran kadroyên siyasî hene. Ez ê van hemûyan bixebitînim. Ez ê van li ser bingeheke rast bixebitînim. Rêyeke din tune ye.”
