MSD’ê ji nû ve dest xebatên lidarxistina hevdîtineke şêwirî der barê rêgezên destûrî de dike.
Hevseroka Nivîsgeha Ragihandinê û endama Desteya Serokatiya MSD’ê Şêra Osê der barê forumê de ji ajansa me re diyar kir ku MSD’ê ji nû ve dest bi xebatên lidarxistina foruma şêwirî ya der barê rêgezên destûrî de kir. Şêra Osê diyar kir ku armanca sereke ji forumê ew e ku rêgezên destûreke giştî saz bike ku bikeve xizmeta çareseriya siyasî û dewleta Sûriyeyê ya demokratîk, pirreng û nenavnedî ava bike.
Di forumê de dê rêgezên destûrî werin nîqaşkirin û reşnivîsek were pêşkêşkirin. Di reşnivîsê de bendên ku di danezana destûrî ya hikumeta veguhêz de nîn in, werin zêdekirin. Piştre dê komîteyeke pispor ji bo nîqaşkirina reşnivîsê were sazkirin.
Şêra Osê diyar kir ku tevger û partiyên siyasî yên li Bakur û Rojhilatê Sûriyeyê, rûspiyên eşîrên Kurd û Ereb, nûnerên sendîka û rêxistinên xwecih, kesayetên ji deverên din ên Sûriyeyê û nûnerên pêkhateyên din ên Sûriyeyê beşdarî forumê bibin.
Diviyabû forum 25’ê Tebaxa borî hatiba lidarxistin. Lê Navenda Ragihandinê ya MSD’ê di 23’yê heman mehê de ragihand ku foruma hat taloqkirin. Taloqkirina forumê di civîna li Reqayê ya Desteya Serokatiyê ya MSD’ê pêk hat.
MSD’ê diyar kiribû ku armanca wê ya talqokirinê ew e ku mercên guncawtir ji bo serxistina diyaloga nîştimanî werin avakirin ku xizmeta çareseriya siyasî û avakirina Sûriyeyeke demokratîk, pirreng û nenavendî bike.
