Têkildarî rewşa Idlibê, civînên Moskoyê mîna yên Enqreyê di navbera dewleta Tirk û Rûsyayê de bê encam bi dawî bûn.
Hemwextî civîna îro, berdevkê AKP’ê gef li Rûsya xwar û got:
Eger rejîm vengere sînorên hevpeymana Sochî, wan amadekariyeke mezin ya leşkerî kiriye.
Li ser erdê pêşketinên rejîma Sûrî bi desteka Rûsyayê dewam in û civînên aliyên garantor jî têkildarî rewşa Idlibê dewam dikin.
Piştî binketina civînên Enqere, dewleta Tirk û Rûsyayê li Moskoyê hevdîtin pêk anîn.
Lê civîna îro li Moskoyê ku derdora 2 saetan dewam kir, mîna ya duh bê encam bi dawî bû û şandeya dewleta Tirk vegeriya Tirkiyê.
Hemwexîtê civînê bi awayekî ne yekser dewleta Tirk li binketina civînê mikur hat.
TIRKIYE: DIBE KU HEVDÎTIN BI RÛSYAYÊ RE LI SER ASTA SEROKAN PÊK BÊN
Wezîrê derve yê dewleta Tirk Mevlut Çauşoglu got:
Eger civîna Moskoyê bê encam bi dawî bû, wê hevdîtineke li ser asta serokên Rûsya û Tirkiyê pêk bê.
Lê çavdêr dibîn ku lihevkirinek di bin maseya aliyên navborî de çêbûye û pêkan e dewleta Tirk li ser radestkirina bajarê Idlibê bo rejîmê erê kiribe.
AKP: AMADEKARIYÊN ÊRÎŞEKE LI DIJÎ REJÎMÊ HAZIR IN
Ji aliyê xwe ve berdevkê AKP’ê gef li Rûsyayê xwar û diyar kir ku ”eger rejîm vengere sînorê hevpeymana Sochî, wan amadekariyên xwe yên leşkerî ji bo êrîşeke li dijî rejîmê kirine”.
Tevî binketina hevpeymana Sûçî, Rûsya dîsan li ser pêkanîna wê tekez kir.
Seroka Meclisa Fedral a Rûs Valintîna Mativînko di daxuyaniyeke çapemeniyê de got:
RÛSYA: TIŞTEK ŞÛNA HEVPEYMANA SÛÇÎ NAGIRE Û DIVÊ TEROR BI DAWÎ BIBE
Tiştek şûna hevpeymana Sûçîyê nagire û divê agirbestek bê pêkanîn.
Valintîna Mativînko li ser berdewamiya şerê li dijî çeteyên dewleta Tirk jî tekez kir û destnîşan kir ku ”girîng e sivîl ji terorîstan bên veqetandin, ji bo ev terorîst bên bidawîkirin.”
DEWLETA TIRK 90 EREBEYÊN LEŞKERÎ Û TANK DERBASÎ IDLIBÊ KIRIN
Hemwextî civînên navborî, dewleta Tirk derbaskirina piştgiriya leşkerî bo Sûriyê dewam dike.
Çavdêriya Sûrî ya Mafên Mirov ragihand ku herî dawî karwanekî ku ji 90 erebeyên leşkerî û tank pêk dihat derbasî bakurê Idlibê kir.
ÇAVDÊRIYA SÛRÎ: TIRKIYÊ LEŞKERÊN XWE LI SERMÎN BELAV KIRIN
Her wiha hemwextî bombebaran Rûsyayê ji bajarok re, dewleta Tirk leşkerên xwe li bajarokê Sermîn yê Idlibê belav kirin.
Hêjayî gotinê ye ku duh serokê rejîma Sûrî Beşar Esed di daxuyaniyeke televizyonî de teqez kiribû ku bidestxistina rojavayê gundewarê Helebê nayê wateya bidawîbûna şer û amadekariyên kontrolkirina Idlib û Heleb bi temamî tên kirin.
