Şervanê Hêzên Komandos ên QSD’ê Çiyarûs bi merasîmekê li Pakrewangeha Şehîd Delîl Saroxan a bajarê Qamişloyê hat oxirkirin.
Merasîm bi deqeyek rêzgitin dest pê kir, piştre ji rêveberên Meclisa Malbatên Şehîdan a Bajarê Qamişlo Mihemed Olo axivî. Mihemed Olo sersaxî ji malbata şehîd re xwest û got: “Şehîd ji bo parastina gel û welatê xwe canê xwe feda dikin, ji ber vê yekê em ê tu carî dest ji xeta şehîdên xwe bernadin.”
Şervanê QSD’ê Yasir Osman jî di destpêka axaftina xwe de şehîdên azadiyê bi bîr anîn û diyar kir ku ’’şehîd Çiyarûs ji malbateke welatparêz bû ku girêdayî ax û gelê xwe bû di rêya parastina welatê xwe de berdêl dane.’’
Osman anî ziman ku dê şopdarên rêya şehîdan bin ta xeyalên wan bi cih bînin û wiha dawî li axaftina xwe anî:”Em di pêvajoyeke hesas re derbas dibin, divê em jî xwediyê vê sekna niha bin û em li hember dagirkeran bisekinin.”
Paşê hevserokê Kongreya Îslama Demokratîk Silêman Elî axivî û got: “Em şehîdê xwe oxirî axa pîroz dikin. Em bi saya berxwedana wan a bêhempa li vir in.”
Piştî axaftinan wesîqeya şehîd Çiyarûs hat xwendin û radestî malbata wî hate kirin.
Cenazeyê şehîd bi tilîliyên dayîkan û dirûşma ’Şehîd namirin’’ spart axê.
Şervanê QSD’ê Çiyarûs (Esmer Ehmed Silêman) 19’ê kanûnê (2025) dema erka xwe bi cih dianî di encama qezayeke leşkerî de li çiyayê Kezwanan a bajarê Hesekê şehîd bû.
