Tevlîhevî û aloziya siyasî ya Iraqê didome.
Serokwezîrê ji bo avakirina hikumeta nû erkdakirî Mihemed Tewfîq Elawî, heta niha nekariye aliyên siyasî ji bo dayîna baweriyê îqna bike.
Civîna dengdana ji bo hikûmê îro careke din, ji ber netemambûna jimara qanûnî, hat paşxistin.
Ji 1’ê Cotmeha 2019’an ve xwepêşandêrên Iraqê li dijî bêkarî û rewşa aborî ya ne baş, daketin kolanan.
Piştre jî daxwazên wan berfirhetir bûn û xwestin ku desthilatdariya heyî, were guhertin.
Li ser zexta kolanan, Serokwezîrê berê Adil Ebdulmehdî neçar ma ku istîfa bike.
Xwepêşandan, derbasî meha 6’an bûn û heta niha hîn hikumeta nû nehatiye avakirin.
Ji ber vê niha Iraq ji aliyê hikûmeta istîfakirî ve tê birêvebirin.
Hikumeta ku Serokwezîrê erkdarkirî Mihemed Tewfîq Elawî hewl dide ava bike, rastî astengiyan tê.
Hem xwepêşandêr û hem jî aliyên siyasî yên parlementoyê Elawî qebûl nakin.
Biryar bû roja pênşemê parlemento bicive û li ser hikumeta Elawî deng bide.
Lê ji ber netemambûna jimara parlamenteran, civîn ji bo îro hatibû paşxistin.
Civîn îro pêk hat.
Lê, li gorî daxuyaniya buroya Serokê Parlementoya Iraqê Mihemed Helbûsî dengdan careke din ji ber heman sedemê, hat paşxistin.
JI BO ELAWÎ TENÊ ROJEK MAYE
Çavdêr dibêjin ji ber ku Elawî bi aliyên kurd û Suniyan re negihaştiye ti lihevkirinê, firsendên qebûlkirina hikûmeta wî pir kêm in.
Li gorî daxuyaniya buroya Helbûsî, tenê sibe li pêşiya Elawî maye ku hikûmeta xwe ava bike û aliyan ji bo dayîna baweriyê îqna bike.
Ji aliyê destûrî ve jî eger hikûmet di civîna dengdanê de nikaribe baweriyê bidest bixe, wê demê divê Serokê Iraqê Berhem Salih, kesekî din li şûna Elawî ekrdar bike.
LI BEXDAYÊ XWEPÊŞANDANA MILYONÎ
Hemwextî hewldanên çareserkirina aloziya siyasî, xwepêşandêrên li kolanan jî gotina xwe dibêjin.
Xwepêşandêr îro tevî astengiyên hêzên ewlehiyê, ji saetên sibehê ve ji hemû parêzgehên başûrê Iraqê, herikîn qada Tehrîr a Bexdayê.
Bi hezaran xwepêşandêr li herêma Kesk, kom bûn.
Hêjayî gotinê ye ku ji destpêka xwepêşandana û heta niha derdora 550 xwepêşandêr hatine kuştin û nêzî 30 hezar jî birîndar bûne.
