Li seranserî cîhanê jimara pêketiyên vîrûsa corona nêzî 4 milyonan dibe. Her wiha zêdeyî 271hezar kesan jî jiyana xwe ji dest dane. Tevî ku hîn xeteriya belavbûna vîrûsê bilind e, lê li hin welatên cîhanê dest bi sivikirin û kêmkirina tedbîran hatiye kirin.
Ev nêzî 5 meh in vîrûsa corona der bûye û li cîhanê belav bûye.
Li seranserî cîhanê hikûmet û dewletên herî mezin ketin seferberiyê û li hemberî hêza vê vîrûsa biçûk a kujer, têk çûn.
Li hemû parzemînan jiyana asayî rawestiya û rewşa awarte hat raghandin.
Li holê tenê, gotin û biryar bû ya “Vîrûsa Corona”.
Ji bilî hin welatên weke Siwêd û Koreya Başûr, piraniya welatên cîhanê ku vîrûs lê belav bû, li dijî vîrûsê tedbîrên hişk girtin.
Heta li hin deveran artêş jî daketin kolanan û pesnê bikaran hêzî ji bo bicihanîn tedbîran hat dayîn.
Deriyên dibistan, balafirxane, zanîngeh, cihên tûrîzmê, cihên îbadetê û gelek dever hatin girtin.
Nexweşxane bi pêketiyên vîrûsê hatin dagirtin û ji ber ku li nexweşxaneyan cih nema, hin welatan nexweşên xwe şandin welatên din.
Li çar hêlên cîhanê, bi hezaran mirovan li hemberî vîrûsê nekarîn li ber xwe bidin û kêliyên xwe yên jiyanê yên herî dawî bi alavên bihikişanê qedandin û xatirê dawî xwestin.
Herî zêde, Amerîka, Îtalya, Spanya, Fransa, Îran û hin welatên din, bîlançoya herî giran dan.
Rêxistina tendurisiyê jî raghandin ku, ji bo pêşîlêgirtina belavbûna vîrûsê, derneketina ji malê tedbîra herî baş bû û serkeftî bû.
Gelek welatan bi vê yekê karîn, vîrûsê konrol bikin.
Dest bi sivikirina tedbîran hatiye kirin
Lê piştî demeke dirêj, ji girtina her deverê, rawestandina jiyanê û tevî ku hîn ti derzî yan jî derman ji vîrûsê re nehatiye dîtin, hin welatan dest bi sivikirina tedbîran kiriye.
Lê heta ku vîrûs bi temamî ji holê rabe, wê tedbîrên parastinê beşek ji jiyana mirovan bin.
Sivikirina tedbîran piştî kêmbûna ber bi çav a pêketiyên vîrûsê li gelek welatên cîhanê pêk hat.
Nemaze welatên ewropa, yên weke Îtalya, Spanya, Almanya, Belçîka û Fransa ku ew jî xwe ji bo kêmkirin û sivikirina tedbîran, amade dike.
Bi taybet bi zêdebûna pêla germahiyê re ku tê gotin hemû vîrûs di germahiyê de dimrin.
Lê belê pispor dibêjin, ev vîrûs nû ye û em nizanin gelo ew jî wê bi germahiyê re biçe yan na, wê pêleke dûyemîn ya vîrûsê hebe yan na.
Tişta balkêş ew e ku li ser jêdera vî vîrûsa ku li Çînê derket hîna jî li hevkirinek nehatiye kirin.
Di vê derbarê de hîna şerê di navbera Çîn, Amerîka û Rêxistina Tendurisiyê ya Cîhanî de dewam dike.
