Ji bo pêşîgirtina li ber fitne û arandinê, Komîteya Rûspiyan a Helebê bi êl û partî û saziyên civakî re yên Helebê re civiya. Hevserokê TEV-DEM’ê Xerîb Hiso di civînê de got ku eger gelên Bakur û Rohilatê Sûriyê nebin yek, dê nemînin. Rûspiyekî êla El-Bû Xemîs jî bang li xelkê herêmê kir ku li dijî fitneyê bibin yek.
Bi armanca lawazkirin an jî têkbirina hevgirtina li herêmên Bakur û Rojhilatê Sûriyê, her wiha tunekirina projeya Rêveberiya Xweser, bi her awayî şer taybet tê meşandin.
Hin aliyên li hundir û derve bêrawestan hewla vê yekê didin û gelên herêmê bera hev didin.
Tevliheviya vê dawiyê ya li Minbicê jî, vê yekê baş nîşan dide.
Da ku pêşî li ber van arandinan were girtin û biratiya gelan bê parastin, civîn û lihevrûniştinên êl û rêveberiyê her dewam in.
Komîteya Rûspiyan a taxa Şêx Meqsûd û Eşrefiyê duh bi amadebûna PYD, MSD, TEV-DEM, nûnerên partiyên siyasî û saziyên civaka sivîl, digel rûspiyên êlên Helebê, civiya.
Sekreterê Giştî yê Partiya Hevbendiya Niştimanî ya Demokrat a li Sûriyê Ehmed Arac da xuyakirin ku Tirkiye, hewl dide weke Efrîn, Serêkanî û Girê Spî, Helebê jî dagir bike û got:
“Eger di deh salên dawî de hevgirtina Bakur û Rojhilatê Sûriyê ne xurt bûya, dê dijmin herêm bi hêsanî dagir bikira. Ji ber vê yekê, ji mêj ve û niha bêtir hewl didin ku herêmê ji hundir ve ji hev bixin û berî daye arandinan”
TEV-DEM: Eger em parastina xwe nekin, dê nemînin
Hevserokê Tevgera Civaka Demokratîk (TEV-DEM) Xerîb Hiso jî anî zimên ku,
“Komplo û siyasetên derexlaqî li hember pêkvejiyana hevbeş dibin kelem. Lewma eger em parastina xwe nekin, dê nemînin.”
Rûspiyekî êla El-Bû Xemîs Şêx Elî El-Hisên her wiha bang li tevahiya xelkê herêmê kir ku li dijî fitneyê li hev kom bibin û bibin gewdeyek.
Melayê taxa Şêx Meqsûdê Şêx Umer El-Şamî destnîşan kir ku,
“Em tev di keştiyekê de ne. Eger xelas bû, em hemû xelas dibin. Eger nûqî avê bû, em tev noq dibin”
Civîna bi piştrastkirina biratiya gelan û pêkvejiyanê bi dawî bû.
