Dewleta Tirk çeteyan ji nû ve rêxistin dike
Li herêmên dagirkirî pevçûn û nakokiyên navbera komên çeteyan û dewleta Tirk kûr dibin.
Lewma Tirkiye hewl dide van çeteyan ji nûve rêxistin bike.
Lê dijberiyên wê jî zêde ne.
Komên çete yên ji aliyê dewleta Tirk ve hatine avakirin û li herêmên dagirkirî hatine bicîhkirin, di nava xwe de û bi avakarê xwe, ya bi Tirkiyeyê ketine rikberiyek kûr.
2017’an anîn cem hev
Dewleta Tirk ji destpêka aloziya Suriyê ve dest bi avakirina komên çeteyan kir û di sala 2017’an de di bin navê ‘Artêşa Niştimanî ya Suriyê!’ de anîn cem hev.
Di vê çarçoveyê de 41 kom wekî 3 feyleq (kolordu) hatin rêxistinkirin.
Beriya dagirkerina Efrînê dewleta Tirk a dagirker hejmara wan daxist 6’an.
Komên ku nakokiyan dijîn, di nava yên din de hatin helandin.
Di vê çarçoveyê de koma bi navê Ceyş El-Ehfad di nova Koma Suleyman Şah de hat helandin.
Piştî dagirkirina serêkaniyê
Piştî dagirkirina Serêkaniyê (2019) careke din di nava komên çeteyan de guhertin hatin çêkirin.
Li gorî planên MÎT’ê, komên di feyleqa yekemîn de yên wekî Ehrar El Şerqiye, Ceyş El-Şerqiye û Firqeya 20’an wekî Tevgera Tehrîr û Bînaa hatin rêxistinkirin.
Piraniya van koman bi komên din û dewleta Tirk re di nava nakokiyan de ne.”
Nakokiyên çeteyan
Piştî van guhertinan di nava çeteyan de nakokî zêdetir bûn.
Her herêmek dagirkirî ket bin kontrola van çeteyan (tevgeran) û xwe wekî xweser nîşan dan.
Vê yekê planên dewleta Tirk a dagirker pêk ne anîn, lewma mudaxele kir û ev navên ku nû hatine diyar kirin (tevger) ji holê rakirin û xwest hemuyan dîsa bi navê Artêşa Niştimanî ya Suriyê! de kom bike.
Pêwendiyên Tirkiye-Şam û bandora li çeteyan
Di sala 2023’yan de dewleta Tirk a dagirker piştî hilbijartinên serokomariyê, bi hikûmeta Şamê re ket nava pêwendiyan.
Tirkiyeyê hewl da ku nakokiyên xwe yên bi welatên Ereban re çareser bike, lewma polîtîkaya xwe ya derve guhert.
Ev siyaseta dewleta Tirk di nava hinek komên çeteyan de bû sedema metirsî, nakokî û bêbaweriyê.
Hinek koman diyar kirin ku Tirkiyê ew firotine.
Pevçûnên çeteyan û berbelavbûna HTŞ’ê
Piştî van nakokî û dijberiyan di navbera komên çeteyan de piraniya sala 2023’yan de pevçûn derneketin.
Li gorî çavkaniyan bi perspektîfa MÎT’ê hat plankirin ku hemû komên çeteyan bixin bin kontrola çeteyên Sultan Murat û yên li dijî siyesate Tirkiyê derdikevin jî bi destê Feyleqa Duyemîn werin tasfiyekirin.
Di çarçoveya vê planê de koma El-Hemzet endamê koma Cebhe Şamiye yê bi navê Ebû Xenûm kuşt.
Ev kuştin bû sedem ku di nava heykeliya Artêşa Niştimanî de guhertinên mezin çêbibin.
Komên çete hîn zêdetir ketin nava pevçûnan.
Di vê navberê de çeteyên Heyet Tehrîr El Şam (HTŞ) ku li Idlib û derdora wê serwer in, li Efrîn, Ezaz, Bab û Cerablusê jî belav bûn, bi navê komên cuda xwe bicîh kirin.
